O‘zbekiston Respublikasi Prezidenti Administratsiyasi rahbarining 2026-yil 12-maydagi 02-1416-sonli topshirig‘iga asosan “O‘zbekiston respublika tovar-xom ashyo birjasi” AJ rahbariyati tomonidan 2026-yil 15-maydan 15-avgustga qadar birja savdolari va davlat xaridlari sohasiga oid masalalar yuzasidan tadbirkorlar bilan uchrashuvlar o‘tkazish grafigi tasdiqlandi.

Mazkur grafik doirasida joriy yilning 15-26-may kunlari turli yo‘nalishlarda faoliyat yurituvchi tadbirkorlar, ishlab chiqaruvchi korxonalar hamda soha vakillari ishtirokida ochiq muloqotlar tashkil etildi.

Ochiq muloqotlar davomida sohaga oid dolzarb muammo va takliflar ilgari surilib, ular yuzasidan masʼullar ishtirokida atroflicha muhokamalar o‘tkazildi.

Xususan, uchrashuvlarda birja brokerlari, suyultirilgan gaz ishlab chiqaruvchilari hamda ulgurji va chakana savdo korxonalari, sement va metall mahsulotlari ishlab chiqaruvchilari, polimer mahsulotlarini qayta ishlovchi va ulgurji sotuvchi korxonalar, rangli va qimmatbaho metallar savdosi bilan shug‘ullanuvchi sotuvchi va xaridorlar, mahalliy ishlab chiqaruvchi korxonalar, fermer xo‘jaliklari va agroklasterlar, chorvachilik hamda parrandachilik sohasidagi tadbirkorlar, oziq-ovqat va qurilish materiallari ishlab chiqaruvchi korxonalar vakillarining murojaat va takliflari o‘rganildi.

Muloqotlar davomida birja savdolari va davlat xaridlari tizimidagi amaliyotlarni takomillashtirish, elektron savdo mexanizmlarini yanada rivojlantirish, tadbirkorlar uchun qulay shart-sharoitlar yaratish hamda hamkorlikni kengaytirish bo‘yicha bir qator takliflar bildirildi.

Shuningdek, ishtirokchilarga birja savdolarida ishtirok etish tartibi, elektron platformalardan foydalanish imkoniyatlari hamda amaldagi normativ-huquqiy hujjatlar yuzasidan zarur tushuntirishlar berildi.

Uchrashuvlarda ko‘tarilgan barcha masala va takliflar belgilangan tartibda ko‘rib chiqilishi hamda ularni amaliy hal etish bo‘yicha tegishli choralar ko‘rilishi taʼkidlandi.

Manba: Ommaviy kommunikatsiyalar va tashqi iqtisodiy faoliyat bo‘limi