Joriy yil 29-iyul kuni O‘zbekiston respublika tovar-xom ashyo birjasi Raqobatni rivojlantirish va isteʼmolchilar huquqlarini himoya qilish qo‘mitasi bilan birgalikda yuqori likvidli va monopol turdagi mahsulotlarni birja savdolari orqali sotishda nazorat qilish asoslari mavzusiga bag‘ishlangan amaliy seminar o‘tkazdi.

“O‘zbekiston respublika tovar xom-ashyo birjasi” AJ Komplayens nazorat va axborot xavfsizligi Bosh boshqarmasi tomonidan tashkil etilgan yig‘ilishda birjaning markaziy apparat xodimlari bilan birga Zoom videokonferensiya dasturi orqali hududiy filiallar xodimlari ham ishtirok etdilar.

Seminarda O‘zbekiston Respublikasining “Raqobat to‘g‘risida”gi qonuni isteʼmolchilarning huquqlarini himoya qilish va adolatli ishbilarmonlik muhitini yaratish uchun muhim ahamiyatga ega ekanligi hamda O‘zbekiston iqtisodiyotida raqobat muhitini taʼminlash va isteʼmolchilar huquqini himoya qilish hamda tashkilotlarda monopoliyaga qarshi kompleks tizimni joriy etish borasida samarali ishlar amalga oshirilayotganligi batafsil tushuntirildi.

Tadbirda Raqobatni rivojlantirish va isteʼmolchilar huquqlarini himoya qilish qo‘mitasi masʼul xodimi Botirov Amirbek Akbarjonovich so‘zga chiqib seminar ishtirokchilariga “Birja savdolarida yuqori likvidli va monopol turdagi mahsulotlarni sotish tartibi” mavzusida maʼruza qildi.

Shu bilan birga, faqat birja savdolari orqali bozor tamoyillari asosida sotiladigan mahsulotlar, xom ashyo va materiallar to‘g‘risida maʼlumot berib o‘tdi.

Xususan, yoqilg‘i-energetika kompleksida 12 turdagi mahsulot 420 nafar subyekt tomonidan birja savdolari orqali realizatsiya qilinayotgan bo‘lsa, kimyosanoatida 21 turdagi mahsulot 48 nafar subyekt tomonidan, agrasanoat kompleksida 13 turdagi mahsulot 3,6 mingdan ortiq subyekt tomonidan hamda qurilish materiallari va metall sanoatida 11 turdagi mahsulot 73 nafar subyekt tomonidan birja savdolariga chiqarilayotganligini maʼlum qildi.

Shuningdek, birja savdolarida yuqori likvidli va monopol turdagi mahsulotlar sotuvchilarining asosiy majburiyatlari to‘g‘risida va raqobat qo‘mitasining yuqori likvidli va monopol turdagi mahsulotlarni realizatsiyasi holatini monitoring qilishi to‘g‘risida yig‘ilish ishtirokchilariga batafsil maʼlumot berib o‘tdi.

Seminar yakunida birja xodimlari o‘zlarini qiziqtirgan savollarga javob oldilar.

Manba: Ommaviy kommunikatsiyalar va tashqi iqtisodiy faoliyat bo‘limi