V Toshkent xalqaro investitsiya forumi (TIIF-2026) doirasida O‘zbekiston respublika tovar-xom ashyo birjasi (UZEX) rahbariyati Phillip Capital xalqaro moliyaviy guruhi tarkibiga kiruvchi Phillip Securities delegatsiyasi bilan uchrashuv o‘tkazdi.

Muzokaralar davomida tomonlar Phillip Capital bilan strategik hamkorlik hamda O‘zbekistonda zamonaviy birja infratuzilmasi va birja vositalarini rivojlantirishga doir qo‘shma loyihalarni amalga oshirish istiqbollarini muhokama qildilar.

Alohida eʼtibor Phillip Capital bilan hamkorlikda tashkil etilgan “UZEX Global” qo‘shma korxonasi orqali mahalliy tadbirkorlarning xalqaro derivativlar bozorlariga chiqish imkoniyatlarini taqdim etish va tovar bozorlari ishtirokchilari uchun samarali xedjerlash tizimini shakllantirish masalalariga qaratildi.

Tomonlar jahon tovar bozorlarining yuqori o‘zgaruvchanligi sharoitida narx xatarlarini boshqarish vositalarining ahamiyati ortib borayotganini taʼkidladilar. Zamonaviy xedjerlash infratuzilmasini yaratish mahalliy ishlab chiqaruvchilar va eksportyorlarga narx xatarlarini samarali sug‘urtalash, moliyaviy natijalar barqarorligini oshirish hamda xalqaro bozorlarda raqobatbardoshlikni kuchaytirish imkonini berishi qayd etildi.

Uchrashuv yakunida tomonlar istiqbolli loyihalarni amalga oshirish bo‘yicha hamkorlikni davom ettirishga kelishib oldilar. Bu O‘zbekiston birja infratuzilmasini rivojlantirish, mamlakatning investitsiyaviy jozibadorligini oshirishga hamda mahalliy biznesning xalqaro derivativlar bozorlariga integratsiyalash imkoniyatlarini kengaytirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi