O‘zbekiston respublika tovar-xom ashyo birjasi delegatsiyasining Qobul shahriga amalga oshirgan xizmat safari doirasida Ghazanfar Bank rahbariyati, xususan Bosh ijrochi direktor Xisrav Fazliy bilan muzokaralar o‘tkazildi va ular yakunlari bo‘yicha Hamkorlik bitimi imzolandi.

Mazkur hujjat 2025 yil noyabr oyida boshlangan o‘zaro hamkorlikning mantiqiy davomi bo‘lib, o‘tgan davr mobaynida afg‘on tadbirkorlariga O‘zbekiston birjasining elektron savdo platformalariga chiqish imkoniyati yaratildi hamda birja orqali umumiy qiymati 15 million AQSH dollaridan ortiq bo‘lgan tashqi savdo shartnomalari amalga oshirildi.

Imzolangan bitim afg‘on tadbirkorlarining birja savdolarida ishtirokini kengaytirish, ularning O‘zbekistonda ishlab chiqarilgan yuqori likvidli mahsulotlarga to‘g‘ridan-to‘g‘ri kirishini taʼminlash, savdo moliyalashtirish mexanizmlarini rivojlantirish va o‘zaro tovar ayirboshlash hajmini yana-da oshirishga xizmat qiladi.

Muzokaralar chog‘ida Ghazanfar Bank O‘zRTXBning Afg‘onistondagi birinchi tizimli moliyaviy hamkori sifatida eʼtirof etildi. Bank afg‘on ishbilarmon doiralari o‘rtasida zamonaviy elektron savdo mexanizmlarini joriy etish va targ‘ib qilishda muhim o‘rin tutadi.

Birja rahbariyati mazkur hamkorlik O‘zbekiston va Afg‘oniston o‘rtasida barqaror elektron savdo yo‘lagini shakllantirish, tadbirkorlar uchun yangi imkoniyatlar yaratish hamda ikki davlat o‘rtasidagi iqtisodiy aloqalarni yana-da mustahkamlashga xizmat qilishini taʼkidladi.

Tomonlar erishilgan kelishuvlar ikki mamlakat o‘rtasidagi savdo-iqtisodiy hamkorlikni yangi bosqichga olib chiqishi, o‘zaro savdo hajmini oshirishi va biznes vakillari uchun yangi imkoniyatlar yaratishiga ishonch bildirdilar.

Manba: Ommaviy kommunikatsiyalar va tashqi iqtisodiy faoliyat bo‘limi