2026 йил 16-18 февраль кунлари Ўзбекистон республика товар-хом ашё биржаси делегацияси Афғонистоннинг Мозори Шариф шаҳрида бўлиб ўтган йирик бизнес-форумида иштирок этди.

Ушбу бизнес-форум икки мамлакат ўртасида савдо-иқтисодий ҳамкорликни мустаҳкамлашга қаратилган бўлиб, унда 200 га яқин Ўзбекистон ва Афғонистон тадбиркорлари иштирок этди.

Тадбирда Ўзбекистон республика товар-хом ашё биржасининг Афғонистон билан савдо қилишга ихтисослашган платформаси ҳамда Афғонистоннинг Ghazanfar Bank банки билан ҳамкорликда очилган хорижий савдо майдончасининг тақдимоти ўтказилди.

Тақдимотда биржада савдо иштирокчиларини аккредитациядан ўтказиш тартиби, савдоларда қатнашиш шартлари ва экспорт-импорт операцияларини амалга оширишда биржа механизмидан фойдаланиш афзалликлари батафсил тушунтирилди.

Мазкур афзалликларга савдолар ва ҳисоб-китобларнинг шаффофлиги, нархларни бозор тамойиллари асосида шаклланиши, ишончли контрагентларнинг кенг базаси, тезкор ва қулай бизнес-жараёнлар, вақт ва маблағнинг тежамкорлиги ҳамда тўловларни ва товарни етказиб беришнинг кафолатлаш каби устунликлар киради.

Шунингдек, тадбир доирасида ишбилармонлик учрашувлари ва икки томонлама B2B музокаралар ташкил этилди. Унда биржа савдоларига маҳсулотларни қўйиш ва сотиб олиш, сотилаётган товарлар номенклатурасини кенгайтириш ва савдо иштирокчиларни электрон савдо тизимига жалб қилиш масалалари муҳокама қилинди.

Тадбир якунида биржанинг хорижий савдо майдончаси орқали озиқ-овқат маҳсулотлари ва қурилиш молларини Афғонистонга экспорт қилиш бўйича битимлар тузишга келишиб олинди.

Ҳурматли тадбиркорлар!

Агар сиз биржа орқали Афғонистон билан савдо қилишни хоҳласангиз, биржанинг Call-маркази (71) 207-00-33 (1076), биржа мутахассиси (+998 88) 776-00-48 рақамларига ёки @uzexfeedbackbot Telegram-ботига мурожаат қилишингиз мумкин.

Манба: Оммавий коммуникациялар ва ташқи иқтисодий фаолият бўлими