2026-yil 16-18-fevral kunlari O‘zbekiston respublika tovar-xom ashyo birjasi delegatsiyasi Afg‘onistonning Mozori Sharif shahrida bo‘lib o‘tgan yirik biznes-forumida ishtirok etdi.

Ushbu biznes-forum ikki mamlakat o‘rtasida savdo-iqtisodiy hamkorlikni mustahkamlashga qaratilgan bo‘lib, unda 200 ga yaqin O‘zbekiston va Afg‘oniston tadbirkorlari ishtirok etdi.

Tadbirda O‘zbekiston respublika tovar-xom ashyo birjasining tashqi savdolar bo‘yicha ishga tushirilgan yangi savdo platformasi hamda Afg‘onistonning Ghazanfar Bank banki bilan hamkorlikda ochilgan xorijiy savdo maydonchasining taqdimoti o‘tkazildi.

Taqdimotda birjada savdo ishtirokchilarini akkreditatsiyadan o‘tkazish tartibi, savdolarda qatnashish shartlari va eksport-import operatsiyalarini amalga oshirishda birja mexanizmidan foydalanish afzalliklari batafsil tushuntirildi.

Mazkur afzalliklarga savdolar va hisob-kitoblarning shaffofligi, narxlarni bozor tamoyillari asosida shakllanishi, ishonchli kontragentlarning keng bazasi, tezkor va qulay biznes-jarayonlar, vaqt va mablag‘ning tejamkorligi hamda to‘lovlarni va tovarni yetkazib berishning kafolatlash kabi ustunliklar kiradi.

Shuningdek, tadbir doirasida ishbilarmonlik uchrashuvlari va ikki tomonlama B2B muzokaralar tashkil etildi. Unda birja savdolariga mahsulotlarni qo‘yish va sotib olish, sotilayotgan tovarlar nomenklaturasini kengaytirish va savdo ishtirokchilarni elektron savdo tizimiga jalb qilish masalalari muhokama qilindi.

Tadbir yakunida birjaning xorijiy savdo maydonchasi orqali oziq-ovqat mahsulotlari va qurilish mollarini Afg‘onistonga eksport qilish bo‘yicha bitimlar tuzishga kelishib olindi.

Hurmatli tadbirkorlar!

Agar siz birja orqali Afg‘oniston bilan savdo qilishni xohlasangiz, birjaning Call-markazi (71) 207-00-33 (1076), birja mutaxassisi (+998 88) 776-00-48 raqamlariga yoki @uzexfeedbackbot Telegram-botiga murojaat qilishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi