24-fevral kuni Toshkent shahrida O‘zbekiston–Belarus ishbilarmonlar kengashining 5-yig‘ilishi doirasida “O‘zbekiston respublika tovar-xom ashyo birjasi” AJ hamda “Belarus universal tovar birjasi” OAJ o‘rtasida Strategik hamkorlikni rivojlantirish to‘g‘risidagi kelishuvni imzolash marosimi bo‘lib o‘tdi.

Hujjat Belarus Respublikasi Bosh vaziri Aleksandr Turchin boshchiligidagi delegatsiyaning O‘zbekiston Respublikasiga amalga oshirgan tashrifi doirasida imzolandi. Mazkur kelishuv ikki mamlakat o‘rtasidagi savdo-iqtisodiy hamkorlikni yana-da chuqurlashtirish va birja savdosi sohasida o‘zaro hamkorlikni kengaytirishga qaratilgan navbatdagi amaliy qadam bo‘ldi.

Kelishuvga muvofiq, savdo ishtirokchilari uchun birja savdolariga o‘zaro kirish imkoniyatlarini kengaytirish, tizimli axborot almashinuvini rivojlantirish, zamonaviy raqamli yechimlarni joriy etish hamda birja mexanizmlaridan foydalangan holda o‘zaro savdo hajmini oshirish nazarda tutilgan.

Tadbir davomida tadbirkorlar uchun O‘zbekiston respublika tovar-xom ashyo birjasi va Belarus universal tovar birjasi faoliyatiga bag‘ishlangan alohida taqdimotlar o‘tkazildi.

Uchrashuv yakunlari bo‘yicha tomonlar birja savdosi imkoniyatlaridan keng foydalanish orqali o‘zaro manfaatli va uzoq muddatli hamkorlikni izchil davom ettirishga kelishib oldilar.

Eslatib o‘tamiz, 2018-yilda Minsk shahrida Belarus universal tovar birjasi bazasida ochilgan O‘zbekiston respublika tovar-xom ashyo birjasining xorijiy savdo maydonchasi ikki mamlakat o‘rtasida birja savdolarini muntazam tashkil etish va o‘tkazishda muhim infratuzilma vazifasini bajarmoqda.

Manba: Ommaviy kommunikatsiyalar va tashqi iqtisodiy faoliyat bo‘limi