25-iyun kuni O‘zbekiston respublika tovar-xom ashyo birjasi (UZEX)da AQSH Savdo vazirligining Tijorat huquqini rivojlantirish dasturi (CLDP) bilan hamkorlikda fyuchers savdosini rivojlantirish va tovar bozorlarida narx xavflarini boshqarishning zamonaviy mexanizmlariga bag‘ishlangan amaliy seminar bo‘lib o‘tdi.

Tadbirda brokerlar, treyderlar, biznes vakillari va birja bozorining boshqa ishtirokchilari qatnashdilar. Seminarning asosiy maqsadi ishtirokchilarni muddatli bozorlarni tashkil etish va xedjirlash instrumentlaridan foydalanish bo‘yicha ilg‘or xalqaro tajriba bilan tanishtirishdan iborat bo‘ldi.

Seminarni CLDPning fyuchers bozorlari bo‘yicha xalqaro eksperti, AQSH Tovar fyucherslari savdosi komissiyasi (CFTC) sobiq direktori o‘rinbosari Kevin Pikkoli olib bordi.

Ekspert muddatli bozorlarni tashkil etish va rivojlantirish bo‘yicha ilg‘or xalqaro tajriba, risk-menejmentning zamonaviy yondashuvlari hamda fyuchers savdosining barqarorligi va samaradorligini ta’minlovchi infratuzilma mexanizmlari haqida ma’lumot berdi.

Tadbirda ta’kidlanganidek, fyuchers shartnomalari zamonaviy bozor iqtisodiyotining muhim instrumentlaridan biri bo‘lib, ular tovar ishlab chiqaruvchilar, eksportchilar va iste’molchilarga narxlar o‘zgaruvchanligi bilan bog‘liq xavflarni kamaytirish, moliyaviy rejalashtirish samaradorligini oshirish hamda biznesning barqaror rivojlanishini ta’minlash imkonini beradi.

Treningning amaliy qismi narx tavakkalchiliklarini xedjirlash mexanizmlari, fyuchers shartnomalarini tuzish va ijro etish tartibi, boshlang‘ich hamda variatsion ta’minotga qo‘yiladigan talablar hamda pozitsiyalarni ochish, qo‘llab-quvvatlash va yopish tartib-taomillarini qamrab oldi.

Seminar doirasida tartibga solish va komplayensning xalqaro standartlariga alohida e’tibor qaratildi. Jumladan, mijozlarni identifikatsiya qilish (KYC) tartib-taomillari, mijozlar aktivlarini ajratib saqlash, bozor ishtirokchilarining moliyaviy barqarorligiga qo‘yiladigan talablar, hisob yuritish va hisobot berish, shuningdek savdo operatsiyalari ustidan nazoratni amalga oshirish masalalari ko‘rib chiqildi.

Shuningdek, UZEX va Phillip Capital hamkorligida tashkil etilgan “UZEX Global” qo‘shma korxonasi orqali mahalliy tadbirkorlarga xalqaro tovar derivativlar bozorlariga chiqish imkoniyatlarini yaratish hamda tovar bozori ishtirokchilari uchun samarali xedjirlash tizimini shakllantirish masalalari alohida muhokama qilindi.

Ekspertlar ta’kidlaganidek, jahon tovar bozorlarida narxlar yuqori darajada o‘zgaruvchan bo‘lgan sharoitda xedjirlash vositalari kompaniyalar moliyaviy barqarorligini ta’minlashning muhim omillaridan biriga aylanmoqda.

Zamonaviy xedjirlash infratuzilmasini yaratish mahalliy ishlab chiqaruvchilar va eksportyorlarga o‘z faoliyati samaradorligini oshirish, bozordagi narx tebranishlarining ta’sirini kamaytirish hamda xalqaro bozorlarda raqobatbardoshligini mustahkamlash imkonini beradi.

Muhokamalar doirasida O‘zbekistonda derivativlar bozorini rivojlantirish, birja infratuzilmasini yanada takomillashtirish va zamonaviy birja vositalaridan foydalanish bo‘yicha biznes uchun imkoniyatlarni kengaytirish istiqbollari ham ko‘rib chiqildi.

O‘tkazilgan seminar UZEXning O‘zbekistonda derivativlar bozorini shakllantirish, fyuchers savdosini rivojlantirish va narx xatarlarini boshqarishning samarali tizimini yaratishga qaratilgan strategiyasini amalga oshirishdagi navbatdagi muhim qadam bo‘ldi.

Manba: Ommaviy kommunikatsiyalar va tashqi iqtisodiy faoliyat bo‘limi