O‘zbekiston Respublikasi Prezidentining milliy musiqa sanʼatini asrash, rivojlantirish va keng targ‘ib etishga qaratilgan farmon va qarorlari ijrosini taʼminlash maqsadida Yunus Rajabiy nomidagi O‘zbek milliy musiqa sanʼati institutida milliy cholg‘u asbobi - g‘ijjak ijrochilik sanʼatini ommalashtirishga bag‘ishlangan maʼnaviy-maʼrifiy tadbir tashkil etildi.

Tadbirda milliy musiqa merosimizni asrab-avaylash, yosh avlodni milliy qadriyatlarga hurmat ruhida tarbiyalash hamda o‘zbek mumtoz musiqa sanʼatining boy anʼanalarini keng targ‘ib qilish masalalariga alohida eʼtibor qaratildi.

Tadbir doirasida O‘zbekiston milliy orkestri rahbari, O‘zbekiston va Qoraqalpog‘iston xalq artisti, mashhur g‘ijjakchi, bastakor, professor hamda o‘zining betakror ijodi va milliy cholg‘uchilik maktabini rivojlantirishdagi ulkan xizmatlari bilan tanilgan ustoz sanʼatkor Abduhoshim Ismoilovning 74 yoshga to‘lganligi munosabati bilan samimiy tabriklandi.

Yig‘ilganlar ustozning milliy musiqa sanʼatini va maqomni rivojlantirish, g‘ijjak ijrochilik maktabini boyitish, ko‘plab shogirdlarni tarbiyalash hamda o‘zbek musiqa madaniyatini yuksaltirish yo‘lidagi beqiyos xizmatlarini alohida eʼtirof etdilar.

Tadbirda O‘zbekiston respublika tovar-xom ashyo birjasi rahbariyati va xodimlari ham ishtirok etib, mamlakatimizda milliy madaniyat va sanʼatni qo‘llab-quvvatlash, maʼnaviy qadriyatlarni mustahkamlash borasida amalga oshirilayotgan islohotlarning ahamiyatini alohida taʼkidladilar va ustoz Abduhoshim Ismoilovni muborak tavallud ayyomlari bilan qutladi hamda unga mustahkam sog‘liq, uzoq umr, oilaviy baxt va ijodiy faoliyatida yangi zafarlar tiladi.

Mazkur tadbir milliy musiqa merosimizga bo‘lgan yuksak ehtiromning yana bir yorqin ifodasi bo‘lib, madaniyat va sanʼat sohasida faoliyat yuritayotgan fidoyi insonlarni qadrlash va qo‘llab-quvvatlashning muhim namunasi sifatida ahamiyat kasb etdi.

Tadbir ishtirokchilarda katta taassurot qoldirib, milliy musiqa sanʼatiga bo‘lgan qiziqishni yanada oshirish, madaniy merosimizni asrab-avaylash va kelgusi avlodlarga yetkazish yo‘lidagi muhim qadamlardan biri bo‘ldi.

Manba: Ommaviy kommunikatsiyalar va tashqi iqtisodiy faoliyat bo‘limi