Жорий йил 27 декабрь куни Ўзбекистон республика товар-хом ашё биржасининг бош офисида Ўзбекистон Республикаси Ёшлар иттифоқи ҳузуридаги “Меҳрли кўллар” Имконияти чекланган ёшлар ва болалар марказининг йиллик ҳисобот анжумани бўлиб ўтди. Тадбирда Марказ ҳомийлари – тадбиркорлик субъектлари вакиллари, кўнгиллилар ва бошқа ғамхўр инсонлар иштирок этдилар.

Тадбир доирасида меҳмонлар ва ҳомийларга Марказнинг ўтган 5 йил давомида амалга оширилган ишлар ва ижтимоий лойиҳаларга бағишланган тақдимоти ўтказилди, ижтимоий видеороликлар намойиш этилди ҳамда имконияти чекланган болалар ва ёшларнинг ижодий кўргазма-ярмаркаси ташкил этилди.

Марказнинг Ўзбекистон республика товар-хом ашё биржаси билан ҳамкорлигида узоқ йўллар давомида олиб бораётган ишлардан кўзланган асосий мақсад ногиронлиги бўлган ёшларга кўмак бериш ва уларнинг манфаатларини ҳимоя қилиш, уларни ҳар томонлама қўллаб-қувватлаш ҳамда улар учун жамиятда тенг ҳуқуқли шароитлар яратишдан иборатдир.

Ўтказилган ярмарка болажонлар ва ёшлар қалбини завқ ва шодликка тўлдирди. Тадбир сўнгида ярмарка меҳмонлари ва иштирокчилари учун байрам дастури, ноз-неъматлар, ва янги йил совғалари топширилди.

Манба: Оммавий коммуникациялар ва ташқи иқтисодий фаолият бўлими