2026-yil 13–15-mart kunlari O‘zbekiston regbi federatsiyasi “O‘zbekiston respublika tovar-xom ashyo birjasi” AJ bilan hamkorlikda Xalqaro xotin-qizlar kuniga bag‘ishlangan 20 yoshgacha bo‘lgan qizlar o‘rtasida regbi-7 bo‘yicha an’anaviy respublika musobaqasi (U-20) ni tashkil etdi.

Musobaqa yosh sportchi qizlarni nufuzli xalqaro turnirlarga, jumladan, regbi bo‘yicha Osiyo chempionati hamda Olimpiya o‘yinlariga tayyorgarlik jarayonining muhim bosqichi sifatida tashkil etildi.

Turnirda O‘zbekistonning turli hududlaridan kelgan 20 yoshgacha bo‘lgan qizlar jamoalari ishtirok etishdi. Ishtirokchilarning keng geografiyasi mamlakatda regbi sport turining jadal rivojlanib borayotganini hamda yoshlar orasida ushbu sport turiga qiziqish ortib borayotganini ko‘rsatmoqda.

Musobaqalar World Rugby qoidalariga muvofiq o‘tkazildi. Turnirning asosiy maqsadi O‘zbekistonda ayollar regbisini rivojlantirish, yoshlar o‘rtasida sog‘lom turmush tarzi va sportni keng targ‘ib etish, shuningdek, sportchi qizlarning sport mahorati va professional tayyorgarligi darajasini oshirishdan iborat bo‘ldi.

Turnir bayramona ruh va sportga xos sog‘lom raqobat muhitida o‘tdi. Jamoalarni qo‘llab-quvvatlash uchun mamlakatning turli hududlaridan ko‘plab muxlislar va regbi ixlosmandlari tashrif buyurdi.

Qizg‘in bahslarga boy bo‘lgan bellashuvlarda har bir jamoa vakillari o‘zaro kuch sinashda kuchli jismoniy, aqliy qobiliyatlari va irodaviy xislatlarini namoyish etishga muvaffaq bo‘ldilar.

Musobaqa yakunlariga ko‘ra, g‘olib va sovrindor jamoalar tadbir tashkilotchilari tomonidan diplomlar, kuboklar hamda qimmatbaho sovg‘alar bilan taqdirlandilar.

Manba: Ommaviy kommunikatsiyalar va tashqi iqtisodiy faoliyat bo‘limi