2024-yilning 26-sentabr kuni Hyatt Regency mehmonxonasida “O‘zbekiston respublika tovar-xom ashyo birjasi” AJning “Xalqchil IPO” Road-show taqdimoti bo‘lib o‘tdi.

Tadbirda KPMG konsalting kompaniyasi Vakili Madina Sarsekeyeva, “O‘zbekiston respublika tovar-xom ashyo birjasi” AJ Boshqaruvi Raisi Ziyoviddin Badriddinov, KAP DEPO investitsiya kompaniyasi Direktori Farrux Xo‘jayev, “Elektron onlayn auksionlarni tashkil etish” AJ Direktori Sohib Murodov va KAP DEPO investitsiya kompaniyasining moliyaviy tahlilchisi Muzaffar Roziqov maʼruza qildilar.

Tadbirda, shuningdek, O‘zbekiston moliya bozorining asosiy vakillari, jumladan, investitsiya kompaniyalari, banklar, sug‘urta tashkilotlari rahbarlari va “O‘zbekiston respublika tovar-xom ashyo birjasi” aksiyadorlik jamiyati aksiyalarini xarid qilishdan manfaatdor bo‘lgan investorlar ishtirok etdi.

Road-show davomida “O‘zbekiston respublika tovar-xom ashyo birjasi” AJ Boshqaruvi Raisi Ziyoviddin Badriddinov maʼruza qildi va u birjaning so‘nggi yillardagi rivojlanish dinamikasi va kompaniyaning o‘rta muddatli istiqbolga mo‘ljallangan rivojlanish strategiyasi haqida maʼlumot taqdim etdi.

Maʼruzada taʼkidlanganidek O‘zbekiston respublika tovar-xom ashyo birjasi yaratilgan infratuzilma va savdo hajmi bo‘yicha MDH tovar birjalari orasida ishonchli tarzda birinchi o‘rinni egallaydi. O‘tgan yili ushbu ko‘rsatkich 14 mlrd AQSH dollarini tashkil etdi va bu O‘zbekiston Yalpi ichki mahsulotining qariyb 15 foiziga to‘g‘ri keladi.

O‘zbekiston respublika tovar-xom ashyo birjasi har yili yuqori moliyaviy ko‘rsatkichlarga erishib kelmoqda, bu esa kompaniya faoliyatining  barqarorligi va samaradorligidan dalolat beradi. Xususan, 2023-yil yakuni bo‘yicha birjaning sof foydasi 229,2 mlrd so‘mni tashkil etib, 2018-yilning shu ko‘rsatkichidan 8,7 barobar ko‘pdir. Birjaning sof foydasi 2024-yil yakuni bo‘yicha 321,0 mlrd so‘m miqdorida kutilmoqda.

“Toshkent” RFB birja kotirovkalari ro‘yxatiga kiritilgan va joylashtirilgan qimmatli qog‘ozlarning likvidligini baholash metodikasi”ga muvofiq jamiyatning aksiyalari yuqori likvidli bo‘lib, eng yuqori toifa – “Premium klass” toifasiga kiritilgan va tovar birjasi ushbu toifaga kiritilgan yagona aksiyadorlik jamiyati hisoblanadi.

Birja dividendlar to‘lash bo‘yicha ham O‘zbekistonda yetakchi o‘rinni egallab turibdi. Oxirgi 10 yil davomida to‘langan dividendlar miqdori barqaror o‘sishni ko‘rsatdi va 2023-yilda har bir aksiya uchun 2600 so‘mni tashkil etib, aksiya nominal qiymatining 412,7 foizini tashkil etdi. Shu bilan birga, so‘nggi to‘rt yil davomida birja yillik sof foydasining 85% dan ortig‘ini dividendlar to‘lashga yo‘naltirdi.

O‘zbekistonda so‘nggi yillarda iqtisodiyotni liberallashtirish siyosatining amalga oshirilishi tufayli UZEX birjasi aksiyadorlar tarkibida xorijiy investorlarning ulushi 3,5 foizgacha oshdi va barqaror o‘sishda davom etmoqda.

Birja savdolarida shaffoflikni yana-da oshirish, birja faoliyatini amalga oshirish uchun belgilangan talablarni takomillashtirish hamda tizimda raqamli texnologiyalarni keng tatbiq etish maqsadida Vazirlar Mahkamasining 2024-yil 12-sentabrdagi “Birja savdolariga ilg‘or axborot texnologiyalarini keng joriy etish hamda sohada raqamlashtirish jarayonlarini izchil davom ettirish chora-tadbirlari to‘g‘risida” 570-son qarori qabul qilindi.

Qarorga ko‘ra 2024-yil 1-noyabrdan boshlab tovar-xom ashyo birjalar faoliyatini litsenziyalashga yangi talablar belgilanmoqda. Xususan, hujjatda birjaning ustav kapitali faqat pul mablag‘ ko‘rinishda shakllantirilishi va kamida 100 mlrd so‘mni, 2025-yil 1-iyuldan esa 200 mlrd so‘mni tashkil etishi belgilab qo‘yildi.

Ushbu talablarni inobatga olgan holda O‘zbekiston respublika tovar-xom ashyo birjasi 2024-yil oxirigacha ustav fondini o‘z kapitali hisobidan 236 mlrd so‘mga yetkazishni rejalashtirmoqda. Shu bilan birga, qo‘shimcha chiqariladigan aksiyalar barcha aksiyadorlar o‘rtasida taqsimlanishi rejalashtirilgan.

Aksiyadorlar huquqlarini himoya qilishda manfaatlar muvozanatidan kelib chiqqan holda, shuningdek, yangi investorlarning ishtiroki kafolatlarini taʼminlash maqsadida “O‘zRTXB” AJ “Xalqchil IPO” ni o‘tkazish va ustav kapitalini ko‘paytirish bo‘yicha shaffof mexanizmni qo‘llash ishlarini amalga oshiradi.

Kompaniya, odatdagidek, qonun talablariga to‘liq rioya qilgan holda, muhim faktlarni KAYaP va “O‘zRTXB” AJ veb-saytida to‘liq oshkor qilishni rejalashtirmoqda.

Kelgusida birjada barcha savdo platformalarida tovar aylanmasining yuqori o‘sish surʼatlarini saqlab qolish, sof foydaning yillik o‘sishini taʼminlash, birja savdolarining shaffofligi va axborot xavfsizligini taʼminlash, savdo infratuzilmasini modernizatsiya qilish, savdo tizimlarini takomillashtirish, xodimlar va birja aʼzolarining malakasini oshirish hamda yangi savdo vositalarini joriy etish bo‘yicha ishlar davom ettiriladi.

Tadbir davomida O‘zbekiston respublika tovar-xom ashyo birjasi faoliyatiga bag‘ishlangan videorolik va taqdimot namoyish etildi. Tadbir ishtirokchilari birjaning savdo platformalari va elektron tizimlari, “O‘zRTXB” AJ savdolarining asosiy afzalliklari, moliyaviy-iqtisodiy ko‘rsatkichlar, hisoblangan dividendlar to‘g‘risidagi maʼlumotlar, shuningdek, UZEX birjasini strategik rivojlantirish bo‘yicha uzoq muddatli rejalar bilan tanishdilar.

Mazkur “Xalqchil IPO” “O‘zbekiston respublika tovar-xom ashyo birjasi” AJ ustav fondining 4,44% aksiyalarini (3 mln donadan ortiq) sotishni nazarda tutadi, ularni joylashtirish narxlari diapazoni har bir aksiya uchun 12 900 so‘mdan 18 000 so‘mgacha, har bir buyurtmadagi aksiyalarning minimal soni - 1 ta, maksimal soni - 1000 ta aksiya. Buyurtmalarni yig‘ish 2024-yil 27-sentabrdan 28-oktabrgacha, bitimlarni bajarilishi va ular bo‘yicha hisob-kitoblarni amalga oshirish 2024-yil 1-noyabrgacha rejalashtirilgan.

“O‘zbekiston respublika tovar-xom ashyo birjasi” AJ aksiyalarini sotib olish bo‘yicha “Xalqchil  IPO” da ishtirok etish uchun Siz “E-AUKSION” elektron savdo platformasi yoki “GO INVEST” mobil ilovasi orqali ariza topshirishingiz mumkin.

O‘zbekiston respublika tovar-xom ashyo birjasi aksiyadori bo‘lishning noyob imkoniyatini qo‘ldan boy bermang!

Manba: Ommaviy kommunikatsiyalar va tashqi iqtisodiy faoliyat bo‘limi