2024-yil 1-2-fevral kunlari O‘zbekiston respublika tovar-xom ashyo birjasi vakillari Bangkok shahrida (Tailand) bo‘lib o‘tgan Fyuchers bozorlari uyushmasining (AFM) 26-chi yillik anjumanida ishtirok etishdi.

Tashrifdan ko‘zlangan asosiy maqsad O‘zbekiston respublika tovar-xom ashyo birjasi taqdimotini o‘tkazish, zamonaviy birja savdo vositalarini joriy etishda dunyoning yetakchi birjalari bilan tajriba almashish, birjalararo hamkorlikni kuchaytirish va birja savdolarining dolzarb masalalarini muhokama qilishdan iborat bo‘ldi.

Anjumanda dunyo mamlakatlarining 40 ta yirik fyuchers birjalari, kliring palatalari, tijorat tashkilotlari va IT-kompaniyalarning 50 dan ziyod vakillari ishtirok etib, birja savdolari, kliring tizimlari va tovar bozorlari, shu jumladan kapital bozorlarining kelajakdagi istiqbollari, mintaqaviy fyuchers industriyasi, atrof-muhitning ifloslanishini bozorlarga taʼsiriga oid mavzular muhokama qilindi.

Birjalarni elektron tijoratda faollashuvi, birja mahsulotlarini raqamlashtirish, bozor ishtirokchilarning savodxonligini oshirish va noodatiy mahsulotlarni birjada sotilishi dunyo birjalarini kelajakdagi rivojlanish istiqbollari sifatida belgilandi.

Anjuman doirasida Fyuchers bozorlari uyushmasi (AFM)ning rahbarlari va aʼzolari uchun O‘zbekiston respublika tovar-xom ashyo birjasining hozirgi holati va istiqbolli rejalari haqida taqdimot o‘tkazildi hamda birja to‘g‘risida videorolik namoyish etildi.

Taqdimotlar yakunlariga ko‘ra xorijiy birja rahbarlari va forumning boshqa ishtirokchilari O‘zbekistonda amalga oshirilayotgan iqtisodiy islohotlar, shu jumladan birja savdolari sohasida erishilgan yutuqlarni yuqori darajada baholadilar.

Anjuman davomida London metall birjasi (LME), Singapur birjasi (SGX), Indoneziya tovar va derivativlar birjasi (ICDX) va Philip Capital xalqaro brokerlik kompaniyasi hamda Trading Technologies, Exberry, Baymarkets va Chella Software kabi dasturiy taʼminotchilar va boshqa xorijiy kompaniyalar vakillari bilan uchrashuvlar o‘tkazildi.

O‘tkazilgan muzokaralar natijalariga ko‘ra birja savdolarini tashkillashtirishda tajriba almashish, brokerlar va mijozlarni treydingga o‘qitish, yangi derivativ bozorlarning texnik jihatdan qo‘llab-quvvatlash sohalarida hamkorlik qilishga kelishib olindi.

Shuningdek, anjuman doirasida Fyuchers bozorlari uyushmasi (AFM) aʼzolarining umumiy yig‘ilishi bo‘lib o‘tdi, unda AFMning 2023-yildagi faoliyati yakunlari, moliyaviy hisoboti va Uyushmaning 2024-2025-yillar uchun ish rejalari muhokama qilindi.

Eslatib o‘tamiz, O‘zbekiston respublika tovar-xom ashyo birjasi 2019-yildan buyon Fyuchers bozorlari uyushmasi (AFM) ning to‘liq aʼzosi hisoblanadi.

Maʼlumot uchun: Fyuchers bozorlari uyushmasi (AFM) – turli davlatlarning birjalari, kliring va boshqa tashkilotlarni bog‘laydigan xalqaro notijorat tashkilot. Uyushma yangi savdo turlari va bozorlarni yaratishda ko‘maklashish hamda tashkilot aʼzolari o‘rtasidagi muloqotni rag‘batlantirish maqsadida 1998-yilda Buenos-Ayresda (Argentina) tashkil topgan.

Manba: Ommaviy kommunikatsiyalar va tashqi iqtisodiy faoliyat bo‘limi