Mustaqil Davlatlar Hamdo‘stligi Xalqaro birjalar uyushmasining (MDH XBU) Umumiy yillik yig‘ilishi doirasida “O‘zbekiston respublika tovar-xom ashyo birjasi” AJ va “TEK-Torg” AJ o‘rtasida hamkorlik va birgalikda faoliyat yuritish to‘g‘risida kelishuv imzolandi.

Kelishuvga muvofiq, tomonlar tashqi savdo jarayonlarini soddalashtirish va tranzaksion xarajatlarni kamaytirishga qaratilgan birja mexanizmlarini joriy qilish orqali O‘zbekiston va Rossiya o‘rtasida meva-sabzavot mahsulotlari tashqi savdosini rivojlantirish sohasida hamkorlik qiladi.

Ushbu maqsadlarda UZEX Agro va TEK-Torg elektron savdo tizimlarining integratsiyalash rejalashtirilmoqda. Bu esa tashqi savdo operatsiyalarining samaradorligi, oshkoraligi va ishonchliligini oshiradi.

Shu bilan birga, tomonlar ishlab chiqaruvchilar, eksportchilar, importchilar, logistika va transport kompaniyalarini elektron savdolarga jalb etish bo‘yicha marketing tadbirlarini birgalikda o‘tkazishni rejalashtirmoqda.

Maʼlumot uchun: UZEX Agro – qishloq xo‘jaligi mahsulotlarini ichki va tashqi bozorlarida bozor narxlarida sotishga mo‘ljallangan 2024 yil oktyabrida ishga tushirilgan O‘zbekiston respublika tovar-xom ashyo birjasining elektron savdo platformasi.

Manba: Ommaviy kommunikatsiyalar va tashqi iqtisodiy faoliyat bo‘limi