2026-yil 30-may kuni O‘zbekiston Respublikasi Investitsiya institutlari milliy uyushmasi (NAII) tomonidan 2025-yil yakunlari bo‘yicha qimmatli qog‘ozlar bozorini rivojlantirishga salmoqli hissa qo‘shgan investitsiya vositachilari, jismoniy va yuridik shaxslarni taqdirlash marosimi bo‘lib o‘tdi.

Tanlov natijalariga ko‘ra, “O‘zbekiston respublika tovar-xom ashyo birjasi” AJ 2025-yil yakunlari bo‘yicha “Eng yaxshi korporativ boshqaruv” nominatsiyasida g‘olib deb topildi.

Birja faoliyatining yuqori baholanishi amaldagi korporativ boshqaruv tizimining samaradorligini tasdiqlaydi. Mazkur tizim aksiyadorlar va menejment manfaatlari muvozanatini taʼminlab, kompaniya faoliyatining shaffofligini oshirish, biznes jarayonlarini takomillashtirish hamda uzoq muddatli barqaror rivojlanishga xizmat qiladi.

Bugungi kunda UZEX mamlakatning eng yirik savdo maydonchasi va O‘zbekistondagi eng jadal rivojlanayotgan aksiyadorlik jamiyatlaridan biri hisoblanadi. Asosiy birja platformasidan tashqari, birjada elektron tijorat sohasida keng ko‘lamli xizmatlarni taqdim etuvchi 9 ta elektron savdo tizimi faoliyat yuritmoqda.

Birjaning keng tarmoqli infratuzilmasi 14 ta hududiy filialni, respublikaning barcha tumanlarida joylashgan 300 dan ortiq savdo maydonchalarini, shuningdek dunyoning turli mamlakatlarida faoliyat yuritayotgan 50 ta xorijiy savdo maydonchalarini o‘z ichiga oladi. Birja mijozlari soni 500 mingdan ortiq savdo ishtirokchilarini tashkil etadi.

Biznesning yuqori rentabelligi va dividend to‘lovlarining izchil o‘sishi tufayli UZEX aksiyalari investorlar orasida barqaror talabga ega. Kompaniya aksiyalari fond bozorining “Premium” toifasiga kiradi.

Hozirgi kunda O‘zbekiston respublika tovar-xom ashyo birjasi aksiyalarining “Toshkent” Respublika fond birjasidagi bozor narxi ularning nominal qiymatidan 7,4 baravardan ko‘proqni tashkil etadi. So‘nggi 10 yil davomida kompaniya dividend to‘lovlarining barqaror o‘sishini namoyon etib, sof foydaning kamida 85 % ni dividend to‘lovlariga yo‘naltirmoqda.

“Eng yaxshi korporativ boshqaruv” nominatsiyasidagi navbatdagi g‘alaba UZEXning yuqori korporativ madaniyatga ega ekanini, investitsiyaviy jozibadorligini hamda ochiqlik, samaradorlik va barqaror rivojlanish tamoyillariga sodiqligini yana bir bor tasdiqlaydi.

Manba: Ommaviy kommunikatsiyalar va tashqi iqtisodiy faoliyat bo‘limi