O'zbek
Ўзбек
Русский
English
Afg‘oniston biznes vakillari birjaga tashrif buyurdi
O‘zbekiston respublika tovar-xom ashyo birjasida Afg‘oniston Islom Amirligi biznes doiralari vakillaridan iborat delegatsiyaning amaliy tashrifi bo‘lib o‘tdi.
Mazkur tashrifdan ko‘zlangan asosiy maqsad O‘zbekiston va Afg‘oniston o‘rtasida savdo-iqtisodiy hamkorlikni yana-da kengaytirish, jumladan, birja mexanizmlari orqali o‘zaro tashqi savdo hajmini oshirishdan iborat bo‘ldi.
Tadbir avvalida mehmonlar uchun birjaning asosiy faoliyat yo‘nalishlari, savdo infratuzilmasi hamda elektron savdo tizimlari bo‘yicha taqdimot o‘tkazildi. Taqdimot doirasida Afg‘oniston bilan savdoga ixtisoslashgan birjaning alohida platformasi hamda Afg‘onistonning Ghazanfar Bank bilan hamkorlikda tashkil etilgan xorijiy savdo maydonchasiga alohida eʼtibor qaratildi.
Jumladan, savdo ishtirokchilarini akkreditatsiyadan o‘tkazish tartibi, savdolarda qatnashish shartlari hamda eksport-import operatsiyalari va o‘zaro hisob-kitoblarni amalga oshirishda birja mexanizmlaridan foydalanish imkoniyatlari va afzalliklari batafsil tushuntirildi.
Qayd etilganidek, mazkur afzalliklar qatoriga savdo va hisob-kitoblarning shaffofligi, narxlarning bozor tamoyillari asosida shakllanishi, ishonchli kontragentlar bazasining kengligi, biznes-jarayonlarning tezkor va qulayligi, vaqt va moliyaviy resurslarni tejash imkoniyati, shuningdek, to‘lovlar va tovar yetkazib berishning kafolatlanishi kabi omillar kiradi.
Tadbir doirasida ishbilarmonlik uchrashuvlari va ikki tomonlama B2B muzokaralar tashkil etildi. Unda Yengil sanoatni rivojlantirish agentligi, “O‘zto‘qimachiliksanoat” uyushmasi, “O‘zkimyoimpeks” MCHJ, “IFODA Agro” MCHJ hamda “O‘zsanoatqurilishmateriallari” uyushmasi vakillari ishtirok etib, o‘z mahsulotlari va hamkorlik imkoniyatlari yuzasidan taqdimotlar o‘tkazdilar.
Muzokaralar natijasida mineral o‘g‘itlar, oziq-ovqat mahsulotlari va qurilish materiallarini birja orqali Afg‘oniston bozoriga eksport qilish bo‘yicha kelishuvlarga erishildi.
Ushbu jarayonlarni qo‘llab-quvvatlash maqsadida birjaning yetakchi aʼzolari tomonidan o‘zaro hamkorlikni mustahkamlash, birja savdolarida samarali ishtirok etish va amaliy ko‘mak ko‘rsatish yuzasidan brokerlik xizmatlari taklif etildi.
Shu bilan birga, delegatsiya aʼzolari birjaning savdo zalida elektron savdolar jarayonini bevosita kuzatish imkoniyatiga ega bo‘lib, amaliy jihatdan savdo mexanizmlari bilan yaqindan tanishdilar.
Tashrif yakunida mehmonlar birja faoliyatini yuqori baholab, bunday amaliy muloqotlar o‘zaro ishonchni mustahkamlash, tadbirkorlar o‘rtasida to‘g‘ridan-to‘g‘ri va samarali aloqalarni kengaytirish hamda birja savdolari orqali ikki davlat o‘rtasidagi savdo hajmini yanada oshirishga xizmat qilishini taʼkidladilar.
Manba: Ommaviy kommunikatsiyalar va tashqi iqtisodiy faoliyat bo‘limi