2026-yil I chorak yakunlariga ko‘ra, O‘zbekiston respublika tovar-xom ashyo birjasining mobilraqam.uzex.uz elektron savdo platformasida tuzilgan bitimlar hajmi o‘tgan yilning mos davriga nisbatan 73,5% ga, bitimlar soni esa 57% ga o‘sdi.

Ko‘rib chiqilayotgan davrda onlayn-auksionlar orqali 2 mingdan ziyod telefon raqamlar sotilib, ularning 97% jismoniy shaxslar va 3% yuridik shaxslar hissasiga to‘g‘ri keldi. Sotilgan raqamlarning eng past bahosi – 31,5 ming so‘mni, eng yuqori qiymati esa 317,2 mln so‘mni tashkil etdi.

Jumladan, mobil raqamlar bo‘yicha eng yuqori narx “O‘zbektelekom” AK tomonidan taklif etilgan chiroyli raqam uchun 208,0 mln so‘mni tashkil etdi. Qisqa raqamlar segmentida esa TBM tarmoq operatoriga tegishli raqam 317,2 mln so‘mga sotildi.

Chiroyli raqamlar sotuvchilari orasida 2026-yil I chorak yakunlariga ko‘ra mutlaq yetakchilik Beeline kompaniyasiga tegishli bo‘lib, ushbu davrda 1 175 ta telefon raqam sotildi. Keyingi o‘rinlarni Ucell (660 ta) va Mobiuz (217 ta) mobil aloqa operatorlari egalladi.

Siz ham birjaning shaffof, qulay va ishonchli savdo tizimidan foydalanib, o‘zingiz istagan nufuzli va noyob telefon raqamni oson va tez xarid qilishingiz mumkin. Buning uchun mobilraqam.uzex.uz veb-saytida onlayn ro‘yxatdan o‘ting va savdolarda qatnashing.

Manba: Ommaviy kommunikatsiyalar va tashqi iqtisodiy faoliyat bo‘limi