O‘zbekiston respublika tovar-xom ashyo birjasi va Singapurning Phillip Capital kompaniyasi o‘rtasida fyuchers savdosini rivojlantirish, zamonaviy tovar derivativ instrumentlarni joriy etish hamda O‘zbekistonning birja infratuzilmasini jahon tovar bozorlari bilan integratsiya qilishga qaratilgan Hamkorlik memorandumi imzolandi.

Mazkur hujjatning imzolanishi mamlakatimizda zamonaviy fyuchers bozorni shakllantirish bo‘yicha olib borilayotgan keng ko‘lamli islohotlarning navbatdagi amaliy bosqichini boshlab berdi. Bu tashabbus O‘zbekiston iqtisodiyotini global derivativlar bozori bilan bog‘lash, milliy birja infratuzilmasini yangi bosqichga olib chiqish va xalqaro tajribalarni amaliyotga tatbiq etishga xizmat qiladi.

Ayniqsa, ushbu hamkorlik mamlakatimizda fyuchers savdosini yo‘lga qo‘yish bo‘yicha ishlar allaqachon amaliy bosqichga o‘tganligi bilan ahamiyatlidir. Tovar fyuchers va boshqa derivativ instrumentlar bozorini tashkil etish maqsadida «UZEX Global» qo‘shma korxonasi tashkil etildi. Mazkur tuzilma milliy derivativlar bozorining asosiy institutsional platformasi bo‘lib xizmat qiladi hamda fyuchers kontraktlari savdosini tashkil etish, kliring va risklarni boshqarish tizimlarini joriy qilishda muhim o‘rin tutadi.

Hamkorlikning yana bir muhim jihati shundaki, loyihani amalga oshirishda Singapur tajribasi asos qilib olinmoqda. Bugungi kunda Singapur dunyoning eng yirik moliyaviy va savdo markazlaridan biri hisoblanadi. U yerda shakllangan derivativlar bozori infratuzilmasi, kliring mexanizmlari, risklarni boshqarish tizimi va birja operatsiyalarini tashkil etish amaliyoti xalqaro ekspertlar tomonidan eng samarali va ilg‘or modellardan biri sifatida eʼtirof etiladi.

Phillip Capital kompaniyasi ko‘p yillik xalqaro tajribaga ega bo‘lib, jahonning yetakchi birjalari va derivativlar bozorlarida faol ishtirok etib kelmoqda. Kompaniyaning ekspert salohiyati va texnologik yechimlari O‘zbekistonda xalqaro standartlarga mos, shaffof va raqobatbardosh fyuchers bozorini shakllantirishga xizmat qiladi.

Loyihaning amalga oshirilishi mahalliy ishlab chiqaruvchilar, eksportyorlar, importyorlar va investorlarga narx xavflarini xedjirlash, bozor o‘zgarishlaridan himoyalanish va zamonaviy moliyaviy instrumentlardan foydalanish imkoniyatini yaratadi. Bu esa iqtisodiyotning real sektori samaradorligini oshirish, investitsiyaviy jozibadorlikni kuchaytirish va bozor mexanizmlarini yana-da rivojlantirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi