O‘zbekiston respublika tovar-xom ashyo birjasida (UZEX) jismoniy va yuridik shaxslarga o‘zlari foydalanayotgan mobil aloqa raqamlarini elektron savdolar orqali sotish imkoniyati yaratildi.

Endilikda mobilraqam.uzex.uz elektron savdo tizimi orqali foydalanuvchilar o‘z mobil raqamlarini auksion va “Tezkor bitim” usulida sotishlari mumkin.

Savdo jarayoni qanday amalga oshiriladi?

Dastlab sotuvchi va xaridor elektron savdo tizimida bepul onlayn ro‘yxatdan o‘tadi. Shundan so‘ng sotuvchi mobil raqamni savdoga joylashtiradi. Xaridor esa tizimdagi raqamlar katalogidan o‘ziga ma’qul raqamni tanlab, auksionda qatnashishi yoki “Tezkor bitim” funksiyasi orqali auksion yakunlanishini kutmasdan bitim tuzishi mumkin.

Savdolarda ishtirok etish uchun sotuvchi raqam narxining 1 foizi, xaridor esa 3 foizi miqdorida zakalat mablag‘ini kiritadi. Savdo boshlanishidan oldin zakalat mablag‘larining kiritilishi tomonlarning bitim bo‘yicha majburiyatlari bajarilishini ta’minlashga xizmat qiladi.

G‘olib aniqlangach, mobil raqamni qayta rasmiylashtirish jarayoni my.gov.uz portali orqali onlayn yoki tegishli mobil aloqa operatorining ofisida amalga oshirilishi mumkin. Rasmiylashtirish yakunlangandan so‘ng UZEX tomonidan sotuvchiga raqam uchun to‘lov o‘tkazib beriladi.

Yangi tizimning asosiy qulayliklari

Mazkur elektron tizim foydalanuvchilarga o‘z mobil raqamlarini masofadan turib savdoga qo‘yish, mavjud raqamlar orasidan o‘ziga ma’qulini izlash va xarid qilish, shuningdek, barcha savdo jarayonlarini yagona elektron platforma orqali amalga oshirish imkonini beradi.

Bundan tashqari, “Tezkor bitim” funksiyasi orqali auksion muddati tugashini kutmasdan savdoni amalga oshirish mumkin.

Elektron savdo tizimining afzalliklari bilan bir qatorda, foydalanuvchilar mobil aloqa operatorlari orqali o‘zlari istagan raqamni onlayn buyurtma qilish imkoniyatiga ham ega.

Yangi xizmat mobil raqamlar savdosining ochiqligi va shaffofligini ta’minlash, elektron savdo imkoniyatlarini kengaytirish hamda foydalanuvchilarning vaqtini tejashga xizmat qiladi.

O‘z mobil raqamingizni sotish yoki yangi raqam xarid qilishni istaysizmi?

mobilraqam.uzex.uz elektron savdo tizimining “Shaxsiy raqamlar savdosi” bo‘limida savdoga qo‘yilgan mobil raqamlar katalogi bilan tanishishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi