AQSH Davlat kotibi Marko Rubio boshchiligidagi delegatsiyaning O‘zbekistonga tashrifi hamda AQSH–O‘zbekiston biznes va investitsiya kengashi doirasida O‘zbekiston respublika tovar-xom ashyo birjasi (UZEX) va AQSHning Nasdaq kompaniyasi vakillari o‘rtasida ishchi uchrashuv bo‘lib o‘tdi.

Uchrashuvda Nasdaq kompaniyasining global sotuvlar bo‘yicha direktori Tomas Nil va moliyaviy texnologiyalar bo‘yicha direktori Dmitriy Zelensov ishtirok etdi.

Muloqot davomida birja texnologiyalarini rivojlantirish, derivativlar bozori infratuzilmasini takomillashtirish va O‘zbekistonda mahalliy fyuchers bozorini shakllantirish istiqbollari muhokama qilindi.

Xususan, UZEXda mahalliy fyuchers savdolarini yo‘lga qo‘yish, elektron savdo platformalarini rivojlantirish, kliring va risk-menejment tizimlarini takomillashtirish masalalariga alohida e’tibor qaratildi.

Shuningdek, UZEX va Phillip Capital hamkorligida tashkil etilgan UZEX Global qo‘shma korxonasining mamlakatda tovar derivativlari bozorini rivojlantirishdagi o‘rni, bozor ishtirokchilarining moliyaviy savodxonligini oshirish hamda mahalliy mutaxassislar malakasini yuksaltirish borasidagi imkoniyatlari ko‘rib chiqildi.

Nasdaq vakillari birja faoliyatiga zamonaviy texnologik yechimlarni joriy etish, ekspertlik ko‘magini ko‘rsatish va mahalliy mutaxassislar malakasini oshirish bo‘yicha hamkorlik imkoniyatlarini taqdim etdilar. Jumladan, UZEX mutaxassislariga Nasdaqning London va Stokgolmdagi birja infratuzilmasi faoliyatini o‘rganish hamda xalqaro tajriba va ilg‘or amaliyotlar bilan bevosita tanishish imkoniyatlari taklif etildi.

Mazkur tashabbuslar UZEX mutaxassislarining kasbiy salohiyatini oshirish, xalqaro tajribani o‘zlashtirish va ilg‘or texnologik yechimlarni milliy birja infratuzilmasini rivojlantirishda qo‘llashga xizmat qiladi.

Uchrashuv yakunida tomonlar hamkorlikning istiqbolli yo‘nalishlarini ekspertlar darajasida batafsil ishlab chiqish, amaliy tashabbuslarni ilgari surish va o‘zaro muloqotni davom ettirishga kelishib oldilar.

Manba: Ommaviy kommunikatsiyalar va tashqi iqtisodiy faoliyat bo‘limi