Joriy yilning 23-yanvar kuni «Shovot – Toshhovuz» chegaraoldi savdo zonasida O‘zbekiston respublika tovar-xom ashyo birjasining savdo maydonchasi rasman ochildi.

Birjaning mazkur savdo maydonchasi 2025-yil noyabr oyida O‘zbekiston Respublikasi va Turkmaniston Respublikasi Prezidentlari ishtirokida «Shovot – Toshhovuz» chegaraoldi savdo zonasini rasman ishga tushirish bo‘yicha erishilgan kelishuvlar doirasida ochildi.

Savdo maydonchasining tantanali ochilish marosimida O‘zbekiston respublika tovar-xom ashyo birjasi, Turkmaniston Davlat tovar-xom ashyo birjasi, shuningdek ikki davlatning tegishli vazirlik va idoralari vakillari ishtirok etdi.

Tadbirda taʼkidlanganidek, mazkur savdo maydonchasini ochishdan ko‘zlangan asosiy maqsad birja mexanizmlaridan foydalangan holda ikki mamlakat tadbirkorlari uchun O‘zbekiston va Turkmaniston tovar bozorlariga erkin o‘zaro kirish va savdo qilishni yengillashtirishdan iborat.

Birja mexanizmlarining afzalliklariga amalga oshiriladigan savdolar va o‘zaro hisob-kitoblarning shaffofligi, narxlarning bozor tamoyillari asosida shakllanishi, ishonchli kontragentlarning keng bazasi, biznes-jarayonlarning tezkor va qulayligi hamda tovarlar uchun to‘lov va yetkazib berishning kafolatlanishi kiradi.

Birjaning yangi savdo maydonchasini ochilishi mahalliy ishlab chiqaruvchilarning eksport salohiyatini kengaytirish hamda O‘zbekiston va Turkmaniston o‘rtasidagi o‘zaro tovar aylanmasini oshirishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi