O‘zbekiston respublika tovar-xom ashyo birjasining Samarqand filiali tomonidan davlat buyurtmachilari va tadbirkorlar uchun elektron davlat xaridlariga bag‘ishlangan seminarlar tashkil etildi.

Tadbirlardan asosiy maqsad O‘zbekiston Respublikasi Prezidentining 2025-yil 26-dekabrdagi “Davlat xaridlari tizimida raqobat muhiti va shaffoflikni taʼminlash bo‘yicha navbatdagi chora-tadbirlar to‘g‘risida”gi PF–259-son Farmonining mazmun-mohiyatini tushuntirish hamda davlat xaridlari sohasidagi yaratilgan yangi imkoniyat va qulayliklar to‘g‘risida maʼlumot berishdan iborat bo‘ldi.

Seminarlar ochiq muloqot shaklida o‘tkazilib, soha mutaxassislari seminar ishtirokchilarining barcha qiziqtirgan savollariga batafsil javob berishdi.

Taʼkidlanganidek, O‘zbekiston Respublikasi Prezidentining 2025-yil 26-dekabrdagi PF–259-son Farmoni bilan davlat xaridlari tizimini tubdan takomillashtirish, ochiqlik va raqobat muhitini kuchaytirish, mahalliy ishlab chiqaruvchilarni qo‘llab-quvvatlash hamda byudjet mablag‘laridan samarali foydalanishni taʼminlashga qaratilgan ustuvor vazifalar belgilab berilgan.

Farmonga muvofiq:

• davlat xaridlarida mahalliy ishlab chiqaruvchilarni faollashtirish maqsadida “takliflar so‘rovi” va “mahalliy auksion” kabi yangi xarid turlari joriy etildi;
• eng yaxshi takliflarni tanlash savdolari takroran eʼlon qilinganda yagona ishtirokchi avvalgi tadbirkor bo‘lsa, savdo o‘tkazilgan deb hisoblanadi;
• auksionda bitta ishtirokchi qatnashganda ham auksion o‘tkazilgan deb eʼtirof etiladi;
• ofertalarning amal qilish muddati 15 kundan 60 kungacha uzaytirildi;
• elektron do‘konda tovarlarni yetkazib berish muddati kamida 5 kun etib belgilandi.

Shuningdek, davlat buyurtmachilarining tovarlar, ishlar va xizmatlarni qabul qiluvchi shaxslariga beriladigan ishonchnomalarni davlat xaridlarining elektron tizimi orqali elektron shaklda rasmiylashtirish amaliyoti yo‘lga qo‘yildi.

Bundan tashqari, birjaning davlat xaridlari elektron tizimida sunʼiy intellektga asoslangan zamonaviy servislar joriy etilib, xarid jarayonlarini yanada soddalashtirish va tezlashtirishga xizmat qilmoqda.

Jamoatchilik nazorati va ochiq muloqotni taʼminlash maqsadida maxsus Telegram botlar — @uzexfeedbackbot va @uzexanticorruptionbot orqali murojaatlar qabul qilinishi yo‘lga qo‘yilgan.

Seminarlar davomida ishtirokchilarga amaliy ahamiyatga ega tavsiya va tushuntirishlar berildi.

Manba: Ommaviy kommunikatsiyalar va tashqi iqtisodiy faoliyat bo‘limi