O‘tgan hafta davomida, yaʼni 10-16-iyun kunlari “O‘zbekiston respublika tovar-xom ashyo birjasi” AJning barcha savdo platformalarida 2 870,8 mlrd so‘mlik tovarlar sotilgan bo‘lib, bu avvalgi haftaga nisbatan 24,6% ga ko‘pdir. Bunda tuzilgan bitimlarning qariyb 80,8% birja savdolariga, qolgan 19,2% qismi esa elektron tijorat savdo tizimlariga to‘g‘ri keldi.

Kichik biznes va xususiy tadbirkorlik subyektlari ishtirokida tuzilgan bitimlarning umumiy hajmi 762,0 mlrd so‘mni tashkil qildi. Davlat xaridlari tizimlarida o‘tkazilgan elektron savdolar natijasida byudjet va korporativ buyurtmachilarining qariyb 120,3 mlrd so‘mlik mablag‘lari tejaldi.

Ko‘rib chiqilayotgan davr mobaynida onlayn auksion orqali 3 911 ta avtoraqamlar sotildi, sotilgan davlat raqam belgilarining umumiy summasi 16,0 mlrd so‘mni tashkil qildi.

Birja savdolari

Ko‘rib chiqilayotgan davrda ochiq birja savdolari orqali jami 2 318,3 mlrd so‘mlik tovar resurslari sotildi, shu jumladan:

Sement

O‘tgan haftada birja savdolari orqali 127 900,0 tonna sement sotildi. O‘rtacha kunlik sotuv hajmlari 25,6 ming tonnani tashkil qildi.

Ko‘rib chiqilayotgan davrda sementning barcha markalari bo‘yicha shakllangan kunlik o‘rtacha narxlar mahsulotning bir tonnasi uchun 581,4 ming so‘mdan 574,8 ming so‘mgacha pasaydi. O‘tkazilgan savdolarda har kuni o‘rtacha 63 ta xaridor ishtirok etdi.

Bug‘doy

Birja savdolarida 20 150,0 tonna bug‘doy sotildi. O‘tkazilgan savdolarda har kuni o‘rtacha 21 ta xaridor ishtirok etdi. O‘rtacha kunlik sotuv hajmlari 4 030,0 tonnani tashkil qildi.

Ko‘rib chiqilayotgan davrda bug‘doyning kunlik o‘rtacha narxlari mahsulotning bir tonnasi uchun 2 992,6 ming so‘mdan 2 948,7 ming so‘mgacha pasaydi.

Paxta yog‘i

O‘tgan hafta davomida birja savdolari orqali 3 765,0 tonna paxta yog‘i sotildi. O‘tkazilgan savdolarda har kuni o‘rtacha 12 ta xaridor ishtirok etdi.

Ko‘rib chiqilayotgan davrda barcha navli paxta yog‘ining kunlik o‘rtacha narxlari mahsulotning bir tonnasi uchun 10 801,9 ming so‘mdan 9 132,4 ming so‘mgacha pasaydi.

Manba: Ommaviy kommunikatsiyalar va tashqi iqtisodiy faoliyat bo‘limi