O‘tgan hafta davomida, yaʼni 15-21-sentabr kunlari “O‘zbekiston respublika tovar-xom ashyo birjasi” AJning barcha savdo platformalarida 37 441 ta bitim tuzilgan bo‘lib, bu avvalgi haftaga nisbatan 4,2% ga kamdir. Ularning 27,7% birja savdolariga, qolgan 72,3% qismi esa elektron tijorat savdo tizimlariga to‘g‘ri keldi.

Davlat xaridlari tizimlarida o‘tkazilgan elektron savdolar natijasida byudjet va korporativ buyurtmachilarining qariyb 301,0 mlrd so‘mlik mablag‘lari tejaldi.

Ko‘rib chiqilayotgan davr mobaynida onlayn auksion orqali 2 716 ta avtoraqamlar sotildi.

Birja savdolari

Ko‘rib chiqilayotgan davrda ochiq birja savdolari orqali jami 10 353 ta bitim tuzildi.

Un

Birja savdolari orqali 9 144,0 tonna un sotildi. O‘rtacha kunlik sotuv hajmlari 1 829,0 tonnani tashkil qildi. O‘tkazilgan savdolarda har kuni o‘rtacha 96 nafar xaridor ishtirok etdi.

Ko‘rib chiqilayotgan davrda un bo‘yicha shakllangan kunlik o‘rtacha narxlar mahsulotning bir tonnasi uchun 3 649,0 ming so‘mdan 3 568,0 ming so‘mgacha pasaydi.

Ammoniy sulfat

O‘tgan haftada birja savdolari orqali 534,0 tonna ammoniy sulfat sotildi. O‘tkazilgan savdolarda har kuni o‘rtacha 5 nafar xaridor ishtirok etdi. O‘rtacha kunlik sotuv hajmlari 107,0 tonnani tashkil qildi.

Ko‘rib chiqilayotgan davrda ammoniy sulfatning kunlik o‘rtacha narxlari mahsulotning bir tonnasi uchun 2 240,9 ming so‘mdan 2 214,1 ming so‘mgacha pasayganini taʼkidlash lozim.

Katodli mis

O‘tgan haftada 1 411,0 tonna katodli mis birja savdolari orqali sotildi. O‘tkazilgan savdolarda har kuni o‘rtacha 6 nafar xaridor ishtirok etdi. O‘rtacha kunlik sotuv hajmlari 282,0 tonnani tashkil qildi.

Ko‘rib chiqilayotgan davrda katodli misning kunlik o‘rtacha narxlari mahsulotning bir tonnasi uchun 134 161,0 ming so‘mdan 131 484,2 ming so‘mgacha pasayganini taʼkidlash lozim.

Manba: Ommaviy kommunikatsiyalar va tashqi iqtisodiy faoliyat bo‘limi