2025-yil 23-24-oktabr kunlari O‘zbekiston respublika tovar-xom ashyo birjasi (UZEX) vakillari Franklin Templeton xalqaro investitsiya kompaniyasi tomonidan tashkil etilgan “Investor kuni” (Investor Day) tadbirida ishtirok etishdi.

Mazkur tadbir O‘zbekistonning iqtisodiy salohiyatini global olamga namoyish etish va xalqaro investorlarni jalb qilish maqsadida tashkil etildi.

“Investor kuni” tadbirida umumiy qiymati 1 trln AQSH dollardan ortiq aktivlariga ega bo‘lgan 67 ta kompaniyalarning 200 dan ziyod nufuzli vakillari ishtirok etdilar. Tadbir qatnashchilari O‘zbekiston respublika tovar-xom ashyo birjasining birja savdosi va elektron tijorat sohasida erishgan yutuqlari va istiqbolli rejalari bilan tanishib chiqdilar.

Uchrashuvlar doirasida UZEX vakillari o‘zlarining strategik rivojlanish yo‘nalishlari, shu jumladan, savdo infratuzilmasini modernizatsiya qilish, savdo tizimlarini takomillashtirish hamda yangi savdo vositalari va xizmatlarini joriy etish rejalari bilan o‘rtoqlashdilar. Xususan, birjaning barcha savdo platformalarida tovar aylanmasi bo‘yicha qayd etilgan yuqori o‘sish surʼatlarini saqlab qolish vazifalari muhokama qilindi.

Muzokaralar davomida birjaning moliyaviy ko‘rsatkichlariga alohida eʼtibor qaratildi. Bunda tovar aylanmaning o‘sish dinamikasi, daromadlarning barqarorligi va operatsion jarayonlarning samaradorligi, korporativ boshqaruv, shu jumladan, kompaniyada ochiqlikni oshirish, ichki nazoratni takomillashtirish, ESG tamoyillarini joriy etish hamda aksiyadorlar va hamkorlar bilan o‘zaro hamkorlikni mustahkamlash doir masalalar muhokama qilindi.

Shuningdek, investorlar O‘zbekiston respublika tovar-xom ashyo birjasining mamlakat va mintaqaning tovar bozorlaridagi mavqeini yana-da mustahkamlashga qaratilgan yangi IT-loyihalari bilan ham tanishdilar.

Uchrashuvlar yakunida xorijiy kompaniyalarning rahbarlari O‘zbekiston respublika tovar-xom ashyo birjasi faoliyatiga yuqori baho berib, uning O‘zbekiston tovar bozorlarida shaffoflikni taʼminlash va bozor munosabatlarini rivojlantirishga qo‘shgan salmoqli hissasini taʼkidlab o‘tdilar.

Manba: Ommaviy kommunikatsiyalar va tashqi iqtisodiy faoliyat bo‘limi