O‘zbekiston Respublikasi Prezidenti va hukumat qarorlari ijrosini taʼminlash doirasida O‘zbekiston respublika tovar-xom ashyo birjasi Fyuchers industriyasi uyushmasi (FIA) xalqaro tashkilotiga to‘la huquqli aʼzosi bo‘ldi.

Fyuchers industriyasi uyushmasi bilan hamkorlik doirasida O‘zbekiston respublika tovar-xom ashyo birjasi uchun xorijiy hamkorlar bazasini kengaytirish va birjalararo aloqalarni mustahkamlash, jahon standartlariga javob beradigan birja savdo vositalari, derivativ bozorlari va kliring tizimlarini rivojlantirishda yangi imkoniyatlar ochilmoqda.

Fyuchers industriyasi uyushmasi 1955 yilda Nyu-York (AQSH)da tashkil topgan bo‘lib, uning asosiy maqsadi global doirada samarali fyuchers va derivativ bozorlarini shakllantirish va rivojlantirishdan iboratdir.

FIA yangi shaffof derivativ bozorlarini qo‘llab-quvvatlaydi hamda global fyuchers industriyasi bo‘yicha o‘zaro fikr, g‘oya va tajriba almashish uchun samarali maydon bo‘lib xizmat qiladi.

Bugungi kunda dunyoning 300 dan ortiq yetakchi xalqaro derivativ birjalari, IT-kompaniyalar va dasturiy mahsulot taʼminotchilari, kliring tashkilotlari, tijorat banklari, konsalting tashkilotlari, xalqaro brokerlik va investitsion kompaniyalar FIA aʼzosi hisoblanadi.

Manba: Ommaviy kommunikatsiyalar va tashqi iqtisodiy faoliyat bo‘limi