2026-yil 28-sentabr kuni “O‘zbekiston respublika tovar-xom ashyo birjasi” AJ (UZEX) va Turkiya Tovar birjasi (Turkish Mercantile Exchange – TMEX/TÜRİB) o‘rtasida o‘zaro hamkorlik memorandumi imzolandi.

Memorandumni UZEX Boshqaruv raisi Asadulla Qayumov va Turkiya Tovar birjasining Bosh ijrochi direktori Ali Kirali imzoladilar.

Memorandum O‘zbekiston va Turkiya tovar birjalari o‘rtasida amaliy va uzoq muddatli hamkorlikni rivojlantirish, tovar savdosini kengaytirish, zamonaviy birja mexanizmlarini joriy etish hamda bozor ishtirokchilari uchun yangi imkoniyatlar yaratishga qaratilgan.

Uchrashuv davomida tomonlar Turkiya Tovar birjasining elektron ombor guvohnomalari (ELÜS) bilan savdoni tashkil etish, litsenziyalangan omborxonalar tizimi, raqamli savdo platformalari va zamonaviy birja texnologiyalarini joriy etish bo‘yicha tajribasi yuzasidan fikr almashdilar.

Hamkorlikning ustuvor yo‘nalishlari sifatida tovar savdosi sohasida tajriba va ilg‘or amaliyot almashish, litsenziyalangan omborxona tizimini rivojlantirish, raqamli platformalar va birja mahsulotlari bo‘yicha hamkorlik qilish, shuningdek, zamonaviy texnologiyalarni joriy etish belgilandi.

Shuningdek, tomonlar fyuchers savdosini rivojlantirish, qishloq xo‘jaligi mahsulotlari bo‘yicha bozor va tahliliy maʼlumotlar almashinuvini yo‘lga qo‘yish, shu jumladan, qishloq xo‘jaligi mahsulotlari narx indekslarini joriy etish imkoniyatlarini o‘rganish bo‘yicha kelishib oldilar.

Memorandum doirasida birja savdosi bilan bog‘liq qoidalar va tartib-taomillarni uyg‘unlashtirish, ikki mamlakat bozorlarida tovar savdosini soddalashtirish hamda O‘zbekiston va Turkiya birja ishtirokchilarining o‘zaro bozorlarga kirish imkoniyatlarini kengaytirish bo‘yicha konsultatsiyalar o‘tkazish nazarda tutilgan.

Tomonlar qo‘shma konferensiyalar, davra suhbatlari va o‘quv seminarlarini tashkil etish, mutaxassislarning o‘zaro tashriflari va stajirovkalarini yo‘lga qo‘yish orqali professional tajriba almashinuvini rivojlantirishga kelishdilar.

Mazkur memorandumning imzolanishi O‘zbekiston va Turkiya tovar bozorlari o‘rtasida amaliy hamkorlikni kengaytirish, birja infratuzilmasini raqamlashtirish va zamonaviy tovar savdosi mexanizmlarini rivojlantirish yo‘lidagi muhim qadam bo‘ldi.

Maʼlumot uchun: Turkiya Tovar birjasi 2019-yilda operatsion faoliyatini boshlagan bo‘lib, qishloq xo‘jaligi mahsulotlariga elektron ombor guvohnomalari (ELÜS) orqali savdo qilish imkonini beruvchi milliy elektron platformani rivojlantirib kelmoqda.

Manba: Ommaviy kommunikatsiyalar va tashqi iqtisodiy faoliyat bo‘limi