O‘zbekiston respublika tovar-xom ashyo birjasining xorijiy savdo maydonchalari UZEX Agro yangi savdo platformasini xorijiy mamlakatlarda targ‘ib qilish bo‘yicha marketing tadbirlarini o‘tkazmoqda.

Xususan, birjaning Latviya Respublikasidagi SM-19 sonli xorijiy savdo maydonchasi Yevropadagi xaridorlarga milliy qishloq xo‘jaligi mahsulotlarini birja mexanizmi orqali xarid qilish imkoniyatlari to‘g‘risida maʼlumot bermoqda.

Xorijiy mijozlar bilan o‘tkazilayotgan uchrashuvlar davomida aholi tomorqalari va dehqon xo‘jaliklari yer maydonlarida yetishtirilgan mahsulotlarni UZEX Agro elektron savdo platformasi orqali to‘g‘ridan-to‘g‘ri tashqi bozorlarga sotish imkoniyatlari batafsil tushuntirilmoqda.

Mazkur elektron savdo tizimi mijozlarga yagona xizmat ko‘rsatish mexanizmi, savdo va o‘zaro hisob-kitoblarning shaffofligi, ishonchli tovar ishlab chiqaruvchilar bilan bevosita aloqa o‘rnatish, vaqt va mablag‘ni tejamkorligi, shuningdek, to‘lovlar amalga oshirish va tovarni yetkazib berilishini kafolatlash kabi bir qator afzalliklarga ega.

Eslatib o‘tamiz, birjaning UZEX Agro yangi savdo platformasi mahalliy qishloq xo‘jaligi mahsulotlarini ichki va tashqi bozorlarda erkin bozor narxlarida realizatsiya qilish maqsadida O‘zbekiston Respublikasi Vazirlar Mahkamasining 2024-yil 2-oktabrdagi 621-sonli qaroriga muvofiq tashkil etilgan.

Mazkur savdo tizimida savdolar raqobatli, raqobatsiz (auksion) yoki narx so‘rovi rejimida o‘tkaziladi. Savdolarda ishtirok etish uchun onlayn ro‘yxatdan o‘tish va birjaning hisob-kitob kliring palatasidagi shaxsiy hisob raqamiga zakalat mablag‘i kiritish kifoya.

Manba: Ommaviy kommunikatsiyalar va tashqi iqtisodiy faoliyat bo‘limi