Mahalliy biznes vakillari ilk bor O‘zbekiston respublika tovar-xom ashyo birjasi (UZEX) orqali Chikago tovar birjasi (CME Group), Nyu-York Interkontinental birja (ICE), London metall birjasi (LME) va dunyoning boshqa nufuzli derivativ birjalariga chiqish va ularning fyuchers shartnomalari bilan savdo qilish imkoniga ega bo‘ladi.

Yangi mexanizm O‘zbekiston Respublikasi Vazirlar Mahkamasining 2026-yil 27-fevraldagi “Narx o‘zgaruvchanligi davrida moliyaviy xavf-xatarlardan samarali himoyalanishni tashkil qilishning qo‘shimcha chora-tadbirlari to‘g‘risida”gi 82-son qarorida nazarda tutilgan.

Qarorga muvofiq, O‘zbekiston respublika tovar-xom ashyo birjasi xalqaro miqyosda tan olingan investitsiya va brokerlik kompaniyasi bilan hamkorlikda “UZEX Global” MCHJ – xalqaro birja vositachisini tashkil etadi.

Ushbu qo‘shma korxona mahalliy tadbirkorlarga xalqaro tovar derivativlari savdolarida ishtirok etish, ichki va tashqi tovar bozorlarida narxlar tebranishlaridan himoyalanish (xedjirlash) va qo‘shimcha daromad olish uchun noyob shart-sharoitlarni yaratib beradi.

Natijada O‘zbekistonda faoliyat yuritayotgan tovar ishlab chiqaruvchilar ilg‘or birja savdo vositalaridan foydalangan holda o‘z ishlab chiqarish faoliyatini samarali tashkil qilish va kengaytirish imkoniyatiga ega bo‘ladi.

Bunda xalqaro birja vositachisi jahon fyuchers savdolarida ishtirok etish uchun mahalliy tadbirkorlar tomonidan kiritilgan milliy valyutadagi mablag‘larni chet el valyutasiga ayirboshlab, xalqaro derivativ birjalariga yo‘naltiradi.

Bu maqsadlarda mahalliy tadbirkorlar uchun zamonaviy risk-menejment tizimi joriy etiladi va ularning moliyaviy savodxonligini oshirish bo‘yicha xalqaro ekspertlar ishtirokida amaliy seminarlar va master-klasslar tashkil qilinadi.

Raqobatni rivojlantirish va iste’molchilar huquqlarini himoya qilish qo‘mitasi mazkur sohada vakolatli organ sifatida ishtirokchilar faoliyatini muvofiqlashtirish, tartibga solish va nazorat qilish vazifalarini amalga oshiradi.

Qabul qilingan qaror, shuningdek, O‘zbekiston respublika tovar-xom ashyo birjasi va milliy iqtisodiyot tarmoqlarini xalqaro birjalar industriyasiga integratsiyalashtirish hamda mamlakatimizda jahon standartlariga mos milliy tovar derivativlari tizimini bosqichma-bosqich joriy etishga xizmat qiladi.

Manba: Ommaviy kommunikatsiyalar va tashqi iqtisodiy faoliyat bo‘limi