O‘zbekiston respublika tovar-xom ashyo birjasi O‘zbekiston Respublikasi Raqobatni rivojlantirish va isteʼmolchilar huquqlarini himoya qilish qo‘mitasi bilan birgalikda mamlakatimizning barcha hududlarida elektron tijorat va davlat xaridlari elektron savdo tizimlarida yaratilgan yangi imkoniyatlar bo‘yicha o‘quv-amaliy seminarlar o‘tkazmoqda.

Dastlabki seminarlar Qoraqalpog‘iston Respublikasi, Xorazm, Andijon, Farg‘ona va Namangan viloyatlarida o‘tkazildi.

Tadbirlardan ko‘zlangan asosiy maqsad elektron tijorat va davlat xaridlariga doir qabul qilingan hukumat qarorlarining mazmun-mohiyati hamda sohada amalga oshirilayotgan islohotlarni tushuntirishdan iboratdir.

Xususan seminarlar davomida davlat xaridlarida ishtirok etishda o‘rnatilgan talablar va tartiblar batafsil tushuntirildi hamda davlat buyurtmachilari tomonidan amalga oshiriladigan to‘g‘ridan-to‘g‘ri shartnoma tuzishda tizimda joriy etilgan yangiliklar haqida batafsil maʼlumotlar berildi va taqdimotlar o‘tkazildi.

Taʼkidlanganidek, to‘g‘ridan-to‘g‘ri xarid qilish turida shartnomalarni jamoatchilik muhokamasidan o‘tkazilish tartibi, yaʼni shartnoma tuzilishidan oldin joylashtirilgan eʼlon muhokama davrida jamoatchilikda eʼtirozlar bo‘lgan taqdirda, jamoatchilik xarid.uzex.uz tizimiga ERI kaliti orqali kirgan holda, tegishli eʼlonga o‘z eʼtirozlarini qoldirishlari mumkin.

O‘zbekiston respublika tovar-xom ashyo birjasining davlat xaridlari elektron savdo tizimida davlat buyurtmachilari tomonidan tuziladigan to‘g‘ridan-to‘g‘ri shartnomalar bo‘yicha amalga oshiriladigan davlat xaridlarida ortiqcha mablag‘larni buyurtmachiga qaytarish funksiyasi joriy etildi, shartnomalarni elektron shaklda tuzish imkoniyati paydo bo‘ldi, maxfiylik ustxatiga ega bo‘lgan hujjatlar asosida tuziladigan to‘g‘ridan-to‘g‘ri shartnomalarni g‘aznachilikka yuborish mexanizmi ishga tushirildi.

Tadbirlarda O‘zbekiston Respublikasi Raqobatni rivojlantirish va isteʼmolchilar huquqlarini himoya qilish qo‘mitasi vakillari davlat xaridlarida sohani nazorat qiluvchi organlar tomonidan aniqlanayotgan asosiy qonunchilik talablari buzilish holatlari sabablari va ularni bartaraf qilish to‘g‘risida maʼlumotlar berishdi.

Shuningdek, O‘zbekiston Respublikasi Vazirlar Mahkamasining 2024-yil 2-oktabrdagi “Zamonaviy agrokompleks faoliyatini ilg‘or birja mexanizmlari asosida tashkil etishning qo‘shimcha chora-tadbirlari to‘g‘risida”gi 621-son qaroriga muvofiq aholi tomorqalarida, fermer va dehqon xo‘jaliklarida yetishtirilgan qishloq xo‘jaligi mahsulotlarini sotish tizimini takomillashtirish, zarur bozor sharoitlarini yaratish orqali aholi va dehqonlar daromadini oshirish maqsadida O‘zbekiston respublika tovar-xom ashyo birjasida yangi agro.uzex.uz elektron savdo platformasi ishga tushirilmoqda.

Birjaning mazkur yangi savdo platformasi aholi tomorqalarida, fermer va dehqon xo‘jaliklari tomonidan yetishtirilgan qishloq xo‘jaligi mahsulotlarini erkin bozor narxida sotishga mo‘ljallangan.

Seminarlar ochiq muloqot shaklida o‘tkazilib, soha mutaxassislari tinglovchilarning barcha qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi