Real bozor narxlarini shakllantirishning zamonaviy mexanizmlarini joriy etish maqsadida O‘zbekiston Respublikasi Vazirlar Mahkamasining 2025-yil 11-apreldagi “Zamonaviy birja mexanizmlarini joriy etish orqali birja savdolarida narxlar o‘zgarishining oldini olishning qo‘shimcha chora-tadbirlari to‘g‘risida”gi 220-son qarori qabul qilindi.

Qaror bilan faqat birja orqali sotiladigan tovarlar ro‘yxati kengaytirildi. Xususan, davlat ulushi 50 foiz va undan ortiq bo‘lgan monopolist-korxonalar yoki tashkilotlar tomonidan ishlab chiqarilgan quyidagi tovarlar birja orqali sotiladi:

• xlorid va nitrat kislotalar;
• natriy sianid va gipoxlorit;
• suyuq azot va xlor;
• rux belilasi
• fosforli ohak;
• ferromolibden, bazalt, fosforit va dolomit uni.

Hujjat bilan, shuningdek, O‘zbekiston respublika tovar-xom ashyo birjasida birja savdolarini ikki tomonlama qarama-qarshi auksion orqali o‘tkazish tartibi to‘g‘risidagi Nizom tasdiqlandi.

Ikki tomonlama qarama-qarshi auksion (keyingi o‘rinlarda – yangi auksion) – bu birja bitimlarining sotuvchilar va xaridorlar o‘rtasidagi raqobat natijasida tuziladigan savdo rejimi bo‘lib, unda tovar uchun narx talab va taklif o‘rtasidagi muvozanat darajasida shakllanadi.

Yangi auksion savdolar shaffofligini oshirish, raqobatni kuchaytirish va mahsulotlarning bozor qiymatini aniqroq aks ettirishga xizmat qiladi.

Tovarlarni ikki tomonlama qarama-qarshi auksion rejimi savdosiga qo‘yishga ularni birja kotirovkalash varag‘iga kiritish yo‘li bilan birjaning Listing komissiyasi tomonidan ruxsat beriladi.

Qarorning to‘liq matni bilan “O‘zRTXB” AJ rasmiy veb-saytining “Me’yoriy-huquqiy baza” bo‘limida tanishishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi