Joriy yil 20-iyun kuni O‘zbekiston respublika tovar-xom ashyo birjasi hamda “O‘ztransgaz” AJ xodimlari ishtirokida strategik korxonalarning Davlat xaridlari sohasidagi muammolarini o‘rganish bo‘yicha davra suhbati bo‘lib o‘tdi. Mazkur tadbir “O‘zbekiston respublika tovar-xom ashyo birjasi” AJ hamda “O‘ztransgaz” AJ  tomonidan tashkil etildi.

Davra suhbatida “O‘zbekiston respublika tovar xom-ashyo birjasi” AJ masʼul xodimlari tomonidan davlat xaridlari tizimida kiritilgan o‘zgarishlar va yangiliklar hamda buyurtmachilar va yetkazib beruvchilar uchun yaratilgan qo‘shimcha qulayliklar batafsil tushuntirib berildi.

Shuningdek, davlat xaridlari bo‘yicha amalga oshirilayotgan islohotlar hamda davlat xaridlari elektron tizimining ishlash tartibi, hududlardagi davlat buyurtmachilari va ular tomonidan amalga oshirilgan davlat xaridlarini tahlili, mavjud kamchilik va muammolar, ularning yechimiga doir masalalar muhokama qilindi.

Tadbir davomida buyurtmachilarga O‘zbekiston Respublikasining “Davlat xaridlari to‘g‘risida”gi Qonuni va O‘zbekiston Respublikasi Vazirlar Mahkamasining 2022-yil 20-maydagi 276-sonli “Davlat xaridlarini amalga oshirish bilan bog‘liq tartib-taomillarni tashkil etish va o‘tkazish tartibi to‘g‘risidagi nizomni tasdiqlash haqida”gi Qarori to‘g‘risida maʼlumotlar berildi.

Tadbirda qonun hujjatlariga muvofiq kiritilgan yangiliklar, o‘zgartirishlar va mezonlar, jumladan, birjaning davlat xaridlari elektron savdo tizimida yaratilgan yangi xizmat va qulayliklar haqida batafsil maʼlumotlar berildi.

Davra suhbati yakunida ishtirokchilar o‘zlarini qiziqtirgan savollarga javob olishdi. Barcha fikr-mulohazalar va takliflar inobatga olinib, bu sohadagi hamkorlikni yana-da rivojlantirishga kelishib olindi.

Manba: Ommaviy kommunikatsiyalar va tashqi iqtisodiy faoliyat bo‘limi