O‘zbekiston respublika tovar-xom ashyo birjasi Afg‘onistonning Ghazanfar Bank banki hamkorligida, uning keng qamrovli hududiy tarmog‘i asosida Qobul, Mozori-Sharif, Xayraton va Afg‘onistonning boshqa yirik shaharlarida birjaning xorijiy savdo maydonchasi filiallarini ochdi.

Endilikda O‘zbekiston va Afg‘oniston tadbirkorlari O‘zbekiston respublika tovar-xom ashyo birjasi va Ghazanfar Bank banki savdo maydonchasi orqali ikki mamlakat tovar bozorlariga o‘zaro chiqishlari va savdo qilishlari mumkin bo‘ladi.

Bunda tadbirkorlar elektron birja savdolari bo‘yicha o‘zaro hisob-kitoblarni amalga oshirishda Ghazanfar Bank bankining hisobvaraqlari va marketing xizmatlaridan ham foydalanishlari mumkin.

Ushbu birja tizimining afzalliklariga elektron savdolar va hisob-kitoblarning shaffofligi, narxlarni bozor tamoyillari asosida shakllanishi, ishonchli kontragentlarning keng bazasi, tezkor va qulay biznes-jarayonlar, vaqt va mablag‘ning tejamkorligi hamda to‘lovlarni va tovarni yetkazib berishni kafolatlash kabi ustunliklar kiradi.

Ghazanfar Bank banki bilan hamkorlikda Afg‘onistonda tashkillashtirilgan birjaning savdo maydonchasi filiallari O‘zbekiston eksport salohiyatini kengaytirish hamda ikki mamlakat o‘rtasidagi o‘zaro savdo aylanmasining o‘sishiga xizmat qiladi.

Bitimlarni tuzish bo‘yicha murojaat uchun:

O‘zbekiston respublika tovar-xom ashyo birjasi

📞 +998 88 776 00 48

Ghazanfar Bank

📞 +93 79 456 55 99

Manba: Ommaviy kommunikatsiyalar va tashqi iqtisodiy faoliyat bo‘limi