24-fevral kuni Malayziya birjasi (Bursa Malaysia) mutaxassislari O‘zbekiston respublika tovar-xom ashyo birjasi uchun “Palma yog‘i bo‘yicha birja savdolarini o‘tkazish va ulardan xejrlash vositasi sifatida foydalanish” mavzusida 2-o‘quv vebinarini o‘tkazdilar.

Tadbir O‘zbekistonning Malayziyadagi elchixonasi ko‘makligida o‘tkazilgan muzokaralar yakunlari bo‘yicha kelishuvlarni amalga oshirish doirasida tashkil etildi.

Vebinarda O‘zbekiston respublika tovar-xom ashyo birjasining markaziy apparati va hududdiy filiallarining rahbarlari va mutaxassislari, shuningdek, UZEX birjasining brokerlik idoralari va savdo maydonchalarining treyderlari ishtirok etdilar.

Vebinar bilimni oshirishga moslashtirilgan bo‘lib, unda palma yog‘i bo‘yicha birja savdolarini o‘tkazish misolida tovar derivativlarining asosiy tushunchalari va o‘ziga xos xususiyatlari atroflicha tushuntirildi. Shuningdek, mazkur bozorning savdo qoidalari va unda amalga oshiriladigan o‘zaro hisob-kitoblar tartibi hamda bozorning tarkibiy tuzilmasi va statistik maʼlumotlari o‘rganildi.

Alohida eʼtibor Markaziy kontragentning derivativlar bozorida tutgan o‘rni va narxlar o‘zgaruvchanligidan kelib chiqadigan xatarlarni sug‘urtalash masalalariga qaratildi. Kafolatli taʼminlash, ochiq pozitsiyalarni yopish va real tovarlarni yetkazib berish masalalari ham ko‘rib chiqildi.

Vebinar ishtirokchilari olingan maʼlumotlarni amaliy ahamiyatga ega ekanligini taʼkidlab, tadbir tashkilotchilariga, shu jumladan O‘zbekiston Respublikasining Malayziyadagi elchixonasiga o‘z minnatdorchiligini bildirib o‘tdilar.

Manba: Ommaviy kommunikatsiyalar va tashqi iqtisodiy faoliyat bo‘limi