O‘zbekiston Respublikasi Prezidenti va Vazirlar Mahkamasining kimyo sanoatining eksport salohiyatini oshirish hamda sohaga bozor mexanizmlarini joriy etish to‘g‘risidagi qarorlari ijrosini taʼminlash doirasida, “Navoiyazot” AJ birja orqali eksportga yangi kimyo mahsulotlarini sotishni boshladi.

Xususan, O‘zbekiston respublika tovar-xom ashyo birjasida eksport uchun sintetik uksus kislotasini realizatsiya qilishga mo‘ljallangan birja shartnomasi ochildi. Mazkur birja shartnomasiga ko‘ra, mahsulotning boshlang‘ich narxi bir tonna uchun 1 100,0 AQSH dollarini tashkil qiladi.

Shuningdek, birjada PVX-S-68 polivinilxlorid bir tonnasi uchun 950,0 AQSH dollari, suvda eruvchan “Uniflok” polimer preparati bir tonnasi uchun 2150,0 AQSH dollari hamda texnik metanol bir tonnasi uchun 230,0 AQSH dollarlik boshlang‘ich bahoda sotila boshlandi.

Ushbu yangi birja mahsulotlari uchun yetkazib berish shartlari – FCA “O‘zbekiston temir yo‘llari” AJ Tinchlik temir yo‘l stansiyasi.

Umuman olganda, O‘zbekiston respublika tovar-xom ashyo birjasi orqali eksportga sotilayotgan mahalliy mahsulotlar nomenklaturasining kengayishi mahalliy mahsulotlarni tashqi bozorlarga bozor tamoyillari asosida olib chiqishga xizmat qiladi.

Eslatib o‘tamiz, 2025-yil fevral oyida O‘zbekiston Respublikasi Prezidenti kimyo sanoatida 2025-yilgi rejalar muhokamasi yuzasidan yig‘ilish o‘tkazgan edi. Unda sohani modernizatsiya qilish, investitsiyalarni jalb etish, raqamlashtirish, energiya samaradorligini oshirish va imkoniyatlaridan samarali foydalanish vazifalari belgilab olingan.

Manba: Ommaviy kommunikatsiyalar va tashqi iqtisodiy faoliyat bo‘limi