“Yashil makon” umummilliy loyihasi doirasida yurtimizda kuzgi daraxt ekish mavsumida ko‘kalamzorlashtirish ishlari jadal suratlar bilan amalga oshirilmoqda.

Mazkur jarayonda “O‘zbekiston respublika tovar-xom ashyo birjasi” AJ ham faol ishtirok etib kelmoqda.

Xususan, joriy yilning 20-noyabr kunidan boshlab Qashqadaryo viloyati, Shahrisabz tumani, «Uloch» MFY hududida joylashgan 4 gektar yer maydonlarida “O‘zbekiston respublika tovar-xom ashyo birjasi” AJ vakillari ishtirokida ko‘kalamzorlashtirish va obodonlashtirish ishlari ko‘tarinki ruhda amalga oshirila boshladi. Hududning iqlim sharoitidan kelib chiqib, 2,5 mingdan ziyod manzarali ko‘chatlar ekilishi rejalashtirilgan. Hozirgi kungacha ushbu maydonga 700 dan ziyod manzarali ko‘chatlar ekildi.

Daraxt ko‘chatlari ekishga O‘zbekiston respublika tovar-xom ashyo birjasi markaziy apparati va Qashqadaryo filialining rahbarlari va xodimlari bilan birga birjaning broker va treyderlari ham o‘z munosib hissalarini qo‘shdilar.

Eslatib o‘tamiz, “Yashil makon” umummilliy loyihasi doirasida manzarali va mevali ko‘chatlarni ekish tadbirlariga O‘zbekiston Respublikasi Prezidenti tomonidan start berilgan edi.

Ushbu loyiha O‘zbekistonning ekologiyasini yaxshilash va yashil hududlarni kengaytirish maqsadida qator muhim tashabbuslarni o‘z ichiga qamrab oladi.

Manba: Ommaviy kommunikatsiyalar va tashqi iqtisodiy faoliyat bo‘limi