Joriy yil 27-dekabr kuni O‘zbekiston respublika tovar-xom ashyo birjasining bosh ofisida O‘zbekiston Respublikasi Yoshlar ittifoqi huzuridagi “Mehrli ko‘llar” Imkoniyati cheklangan yoshlar va bolalar markazining yillik hisobot anjumani bo‘lib o‘tdi. Tadbirda Markaz homiylari – tadbirkorlik subyektlari vakillari, ko‘ngillilar va boshqa g‘amxo‘r insonlar ishtirok etdilar.

Tadbir doirasida mehmonlar va homiylarga Markazning o‘tgan 5 yil davomida amalga oshirilgan ishlar va ijtimoiy loyihalarga bag‘ishlangan taqdimoti o‘tkazildi, ijtimoiy videoroliklar namoyish etildi hamda imkoniyati cheklangan bolalar va yoshlarning ijodiy ko‘rgazma-yarmarkasi tashkil etildi.Markazning O‘zbekiston respublika tovar-xom ashyo birjasi bilan hamkorligida uzoq yo‘llar davomida olib borayotgan ishlardan ko‘zlangan asosiy maqsad nogironligi bo‘lgan yoshlarga ko‘mak berish va ularning manfaatlarini himoya qilish, ularni har tomonlama qo‘llab-quvvatlash hamda ular uchun jamiyatda teng huquqli sharoitlar yaratishdan iboratdir.

O‘tkazilgan yarmarka bolajonlar va yoshlar qalbini zavq va shodlikka to‘ldirdi. Tadbir so‘ngida yarmarka mehmonlari va ishtirokchilari uchun bayram dasturi, noz-ne’matlar, va yangi yil sovg‘alari topshirildi.

Manba: Ommaviy kommunikatsiyalar va tashqi iqtisodiy faoliyat bo‘limi