O‘zbekiston respublika tovar-xom ashyo birjasi mamlakatimizning barcha hududlarida tadbirkorlar uchun elektron davlat xaridlariga bag‘ishlangan seminarlar o‘tkazmoqda.

Joriy yilning noyabr oyida seminarlar Qoraqalpog‘iston Respublikasi, Surxondaryo, Andijon, Xorazm va Samarqand viloyatlarida o‘tkazildi.

Tadbirlardan ko‘zlangan asosiy maqsad elektron davlat xaridlari tizimida yaratilgan qulayliklar va afzalliklarni tushuntirishdan iborat bo‘ldi.

Seminarlar davomida davlat xaridlarida ishtirok etish tartiblari, tizimda joriy etilgan yangiliklar haqida batafsil maʼlumotlar berildi va taqdimotlar o‘tkazildi.

Taʼkidlanganidek, O‘zbekiston respublika tovar-xom ashyo birjasi davlat xaridlari elektron tizimining yirik va tajribali operatori sifatida faoliyat yuritib kelmoqda. Mazkur tizim davlat xaridlari shaffofligini taʼminlash va samaradorligini oshirishda muhim ahamiyat kasb etadi.

Birja IT kompaniya sifatida 2011-yildan buyon davlat xaridlari elektron tizimini takomillashtirib kelmoqda.

Joriy yilda xarid.uzex.uz elektron davlat xaridlari tizimida buyurtmachilar va ishtirokchilar uchun qo‘shimcha qulayliklar yaratish maqsadida bir qator yangiliklar joriy etildi.

Xususan, birjaning yangi Xarid (iOS uchun) elektron davlat xaridlari mobil ilovasi joriy qilindi. mobil ilova foydalanuvchilarga davlat xaridlari doirasida elektron do‘konda va boshlang‘ich narxni pasaytirish uchun o‘tkaziladigan auksionlarda qatnashish imkoniyatini taqdim etadi.

Elektron davlat xaridlari tizimida mijozlarni qo‘llab-quvvatlash maqsadida sunʼiy intellektga asoslangan zamonaviy yechim bo‘lgan AI Chat-bot xizmati joriy etildi.

Endilikda, xarid.uzex.uz platformasida avtorizatsiyadan o‘tgan foydalanuvchilar real vaqt rejimida, birjaning Call-markaziga murojaat qilmasdan, o‘zlarining so‘rovlariga tezkor javoblar va texnik ko‘mak olishlari mumkin.

Sunʼiy intellekt servislari, shuningdek, elektron davlat xaridlari tizimida buyurtmachi va ishtirokchilar eʼlonlarini moderatsiyadan o‘tkazishda ham keng qo‘llanilmoqda.

Shuningdek, birjaning xarid.uzex.uz elektron savdo tizimida mahalliy ishlab chiqaruvchilar uchun tovarlar katalogini shakllantirish mexanizmi joriy qilindi. Ushbu servis avval tizimga joylashtirilgan mahsulotlarni takroran moderatsiyadan o‘tkazish zaruratidan ozod etadi.

Bundan tashqari, O‘zbekiston respublika tovar-xom ashyo birjasi xarid.uzex.uz elektron davlat xaridlari tizimi va O‘zbekiston Respublikasi Adliya vazirligining license.gov.uz elektron litsenziyalash tizimi bilan axborot almashinuvi yo‘lga qo‘yildi.

Bularning barchasi birjaning xarid.uzex.uz elektron savdo tizimiga mahsulotlarni joylashtirish va sotish jarayonlarini yengillashtiradi.

Shuningdek, birjada muloqot va jamoatchilik nazoratining samarali tizimi joriy qilingan. Misol uchun, bugungi kunda birjada @uzexfeedbackbot va @uzexanticorruptionbot telegram botlari faol ishlab kelmoqda.

Seminarlar ochiq muloqot shaklida o‘tkazilib, soha mutaxassislari seminar ishtirokchilarining barcha qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi