Elektron davlat xaridlari tizimining samaradorligini oshirish hamda ularda davlat buyurtmachilarining ishtirokini qo‘llab-quvvatlash va yengillashtirish maqsadida O‘zbekiston respublika tovar-xom ashyo birjasi davlat xaridlari bo‘yicha davra suhbatlari va seminarlar o‘tkazishni boshladi.

Dastlabki seminarlar yirik davlat buyurtmachilari, shu jumladan “O‘zkimyosanoat” AJ, “Hududiy elektr tarmoqlari” AJ, “Farg‘onaazot” AJ, “O‘zbekgidroenergo” AJ, “Davlat belgisi” DUK, “Issiqlik elektr stansiyalari” AJ va “O‘zavtosanoat” AJ uchun tashkillashtirildi.

Davra suhbatlari va seminar-treninglar to‘g‘ridan-to‘g‘ri va zoom onlayn aloqa vositasidan foydalangan holda taqdimotlar, savol-javoblar va ochiq muloqotlar shaklida o‘tkazildi.

Tadbirlar davomida elektron davlat xaridlarining dolzarb masalalari keng muhokama qilindi. Shu jumladan, O‘zbekiston respublika tovar-xom ashyo birjasining davlat xaridlari bo‘yicha xarid.uzex.uz va etender.uzex.uz elektron savdo platformalarida ishtirok etish tartiblari va afzaliklari tushuntirildi.

Shuningdek, elektron davlat xaridlari tizimida kiritilgan so‘nggi o‘zgarishlar va yangiliklar hamda buyurtmachi va yetkazib beruvchilar uchun yaratilgan qo‘shimcha qulayliklar to‘g‘risida to‘liq ma’lumotlar berildi.

Seminarlarda birja mutaxassislari seminarlar ishtirokchilarini qiziqtirgan barcha savollarga javob berdilar, kiritilgan taklif va mulohazalar ko‘rib chiqish va ular yuzasidan tegishli qarorlar chiqarish uchun qabul qilindi.

Shu kabi ochiq tadbirlarni tasdiqlangan rejaga muvofiq boshqa davlat buyurtmachilari uchun ham o‘tkazilishi kutilmoqda.

Manbaa: "O'zRTXB" AJ PR bo'limi