Birja vakillari xalqaro konferensiyada ishtirok etdi
Joriy yil 8-sentabr kuni Toshkentda “O‘zbekiston Respublikasi kapital bozori” IV xalqaro konferensiyasi o‘tkazildi. Tadbir O‘zbekiston investitsiya institutlari milliy uyushmasi ko‘magida tashkil etildi.
Konferensiyada nazorat qiluvchi organlar, mahalliy banklar, investitsiya kompaniyalari, ishlab chiqaruvchi korxonalar, shuningdek, xalqaro moliya institutlari, reyting agentliklari, infratuzilma kompaniyalarining 200 ga yaqin vakillari ishtirok etdi.
Tadbirning asosiy mavzusi qimmatli qog‘ozlar va kapital bozorida sarmoyadorlar uchun yaratilayotgan imkoniyatlar to‘g‘risida bo‘ldi. Shuningdek, anjuman ishtirokchilari respublika moliya bozori, mahalliy kompaniyalarning tashqi qarzdorlik bozorlariga chiqishi, mamlakat qimmatli qog‘ozlar bozoriga kirishi, mazkur sohalarning istiqbollari, rejalari va imkoniyatlarini muhokama qildilar.
O‘zbekiston respublika tovar-xom ashyo birjasi ham mazkur forumda faol ishtirok etdi. Xususan, birja faoliyatining joriy holati va uning rivojlanish istiqbollariga bag‘ishlangan taqdimot o‘tkazildi.
Taqdimot davomida birja infratuzilmasi, elektron savdo tizimlari va birjaning rivojlanish dinamikasi, shuningdek, rentabellik ko‘rsatkichlari va kelgusidagi istiqbolli rejalar to‘g‘risida batafsil ma’lumotlar berildi.
Mazkur konferensiya milliy iqtisodiyotning turli tarmoqlarini rivojlantirishga mahalliy va xorijiy sarmoyalarni jalb etishda O‘zbekiston qimmatli qog‘ozlar bozorining foydalanilmagan ulkan salohiyatini ko‘rsatdi.
Manbaa: "O'zRTXB" AJ PR bo'limi