2025-yil 8-sentabr kuni Chikago tovar birjasi (CME Group)ning Osiyo-tinch okeani mintaqasi bo‘yicha Boshqaruvchi direktori Rassel Biti O‘zbekiston respublika tovar-xom ashyo birjasi (UZEX)ga tashrif buyurib, mahalliy birja rahbariyati bilan uchrashuv o‘tkazdi.

Mazkur tashrif birjalararo hamkorlikni kengaytirish va zamonaviy birja savdo mexanizmlarini rivojlantirish bo‘yicha tajriba almashishda muhim qadam bo‘ldi.

Uchrashuv avvalida O‘zbekiston respublika tovar-xom ashyo birjasining Boshqaruv raisi Asadulla Qayumov xorijiy mehmonga tashrif buyurgani uchun minnatdorlik bildirib, dunyoning eng yirik tovar birjasi bilan hamkorlikni yo‘lga qo‘yilishi strategik ahamiyatga ega ekanligini alohida taʼkidlab o‘tdi.

Muzokaralar davomida jahon birjalari industriyasi rivojlanishining so‘nggi tendensiyalari va istiqbollari hamda ikki birja o‘rtasidagi aloqalarni har tomonlama rivojlantirishga doir masalalar keng muhokama qilindi.

Rassel Biti O‘zbekistonda amalga oshirilayotgan iqtisodiy islohotlar, shu jumladan birja savdolari sohasida erishilgan yutuqlarga yuqori baho berib, O‘zbekiston mutaxassislari va savdo ishtirokchilari uchun o‘quv dasturlarini tashkil etishda ko‘mak berishga tayyorligini bildirdi.

Tashrif yakunlari bo‘yicha tomonlar o‘zaro hamkorlik aloqalarini davom ettirish hamda O‘zbekistonda birja savdolarini takomillashtirish va rivojlantirish masalalari bo‘yicha maslahatlashuvlarni muntazam o‘tkazishga kelishib oldilar.

Manba: Ommaviy kommunikatsiyalar va tashqi iqtisodiy faoliyat bo‘limi