Davlat xaridlari bo‘yicha navbatdagi seminarlar o‘tkazildi
O‘zbekiston respublika tovar xom-ashyo birjasi O‘zbekiston Respublikasi Moliya vazirligining G‘aznachiligi bilan birgalikda “Tadbirkorlik sub’ektlarining elektron davlat xaridlari tizimidagi ishtirokini kengaytirish” mavzusida navbatdagi o‘quv seminarlarini Qoraqolpog‘iston Respublikasi, Buxoro, Samarqand, Qashqadaryo va Surxondaryo viloyatlarida o‘tkazdi.
O‘quv seminarlarida O‘zbekiston respublika tovar xom-ashyo birjasining hududdiy filiallari va G‘aznachilik boshqarmalarining vakillari, davlat buyurtmachilari, xo‘jalik yurituvchi sub’ektlar va tadbirkorlar ishtirok etdilar.
Tadbirlarda birjaning elektron davlat xaridlari tizimida buyurtmachi va ishtirokchilar uchun yaratilgan sharoitlar va imkoniyatlar to‘g‘risida batafsil ma’lumotlar berildi. Shu jumladan birjaning davlat xaridlari bo‘yicha xarid.uzex.uz va etender.uzex.uz elektron savdo platformalarining afzalliklari ochib berildi.
Seminarlar davomida, shuningdek, davlat xaridlari tizimida kiritilgan o‘zgarishlar va yangiliklar hamda buyurtmachi va yetkazib beruvchilar uchun yaratilgan qo‘shimcha qulayliklar batafsil tushuntirib berildi.
Ta’kidlanganidek, birjaning etender.uzex.uz elektron savdo tizimida mahalliy ishlab chiqaruvchilarga nisbatan 15% miqdorida preferensiya qo‘llanilishi yo‘lga qo‘yildi. Mazkur tizimda davlat xaridlari bo‘yicha tuzilgan shartnomalarga qo‘shimcha kelishuv tuzish imkoniyati ham yaratildi.
Shuningdek, davlat xaridlarining etender.uzex.uz elektron savdo tizimida norezident ishtirokchilarning takliflarini xolis baholashning yangi tizimi joriy qilindi. Bunda elektron tizim norezident ishtirokchilarning takliflarini buyurtmachi tomonidan kiritgan qo‘shimcha xarajatlarni inobatga olgan holda hisoblaydi.
Seminarlar ishtirokchilari o‘zlarini qiziqtirgan savollariga javob oldilar hamda olingan ma’lumotlarning foydali ekanligini ta’kidladilar.
Manbaa: "O'zRTXB" AJ PR bo'limi