O‘zbekiston respublika tovar-xom ashyo birjasining davlat xaridlari bo‘yicha etender.uzex.uz – tanlov va tender elektron savdo tizimida bir qator yangi xizmatlar joriy etildi.

Birinchi yangilik tanlov va tender bo‘yicha elektron savdolar natijalarini davlat buyurtmachisi tomonidan qabul qilinishi bilan bog‘liq. Xususan, elektron bayonnoma shakllantirilganidan so‘ng davlat buyurtmachisi akseptni qabul qilishi yoki bekor qilishi mumkin.

Aksept rad etilgan taqdirda, davlat buyurtmachisi o‘z qarorini asoslab berishi kerak bo‘ladi.

O‘z navbatida savdo g‘olibi ham akseptni qabul qilishi yoki rad etishi mumkin, rad etilgan taqdirda aksept avtomat ravishda zaxiradagi g‘olibga yo‘llanadi.

Ikkinchidan, davlat buyurtmachilariga qulaylik yaratish maqsadida mazkur savdo tizimining shaxsiy kabinetida davlat xaridlarini monitoring qilish xizmati joriy etildi. Shaxsiy kabinetning “Monitoring” sahifasi orqali davlat xaridlari bo‘yicha tuzilgan bitimlarning monitoringini amalga oshirish mumkin.

Bundan tashqari, endilikda budjet buyurtmachilaridan tashqari korporativ buyurtmachilar ham davlat xaridlari bo‘yicha etender.uzex.uz elektron savdo tizimida tuzilgan bitimlar uchun qo‘shimcha kelishuvlar imzolash imkoniyatiga ega bo‘lishdi. Qo‘shimcha kelishuvlar orqali buyurtmachi yoki ishtirokchining rekvizitlarini, shuningdek, bitim narxini ham o‘zgartirish mumkin.

Manba: Ommaviy kommunikatsiyalar va tashqi iqtisodiy faoliyat bo‘limi