2023-yil 13-iyun kuni Xitoyning oziq-ovqat, qurilish, neft, kimyo, IT va farmatsevtika sohalaridagi 10 ta kompaniyalari vakillari O‘zbekiston respublika tovar-xom ashyo birjasi (UZEX) markaziy ofisiga tashrif buyurdilar.

Xitoylik tadbirkorlarning birjaga tashrifi O‘zbekiston Respublikasi Prezidenti Shavkat Mirziyoyevning 18-19-may kunlari Xitoy Xalq Respublikasiga uyushtirilgan davlat tashrifi chog‘ida belgilangan vazifalarni bajarish, shuningdek O‘zbekiston respublika tovar-xom ashyo birjasi va Xitoyning O‘zbekistondagi tadbirkorlari uyushmasi o‘rtasida imzolangan hamkorlik to‘g‘risida Memorandum doirasida amalga oshirildi.

Seminar avvalida birjaga tashrif buyurganlar uchun birja faoliyati to‘g‘risidagi prezentatsion videorolik namoyish etildi. Mehmonlar birjaning savdo platformalari va qo‘llaniladigan birja vositalari, hamda UZEX birjasining joriy holati va istiqbolli rejalari bilan tanishib chiqdilar.

Tashqi savdo bitimlarini tuzishda birja mexanizmlarining afzalliklari va imkoniyatlari alohida eʼtirof etildi. Taʼkidlanganidek, birjaning savdo tizimlari savdo va hisob-kitoblarning shaffofligi, ishonchli tovar ishlab chiqaruvchilar bilan bevosita aloqa o‘rnatish, vaqt va mablag‘ tejamkorliligi, shuningdek to‘lovlarni va tovarni yetkazib berishning kafolatlash kabi afzalliklarga ega.

Muzokaralar yakunlari bo‘yicha Xitoy kompaniyalarining ayrim turdagi mahsulotlarni birja savdo platformasiga qo‘yish va birja mexanizmlaridan foydalangan holda savdo imkoniyatlarini kengaytirish sohasida hamkorlikni davom ettirish bo‘yicha kelishuvga erishildi.

Manba: Ommaviy kommunikatsiyalar va tashqi iqtisodiy faoliyat bo‘limi