Joriy yil 22-23-oktabr kunlari O‘zbekiston respublika tovar-xom ashyo birjasining Farg‘ona filialida tadbirkorlar uchun yangi savdo vositalari bo‘yicha seminar va jurnalistlar uchun media-trening o‘tkazildi.

Mazkur tadbirlarda birja aʼzolari, treyderlari, savdo ishtirokchilari va ommaviy axborot vositasi vakillari ishtirok etishdi.

Seminar O‘zbekiston Respublikasi Raqobatni rivojlantirish va isteʼmolchilar huquqlarini himoya qilish qo‘mitasi qoshidagi Raqobat siyosati va isteʼmolchilar huquqlari tadqiqotlari markazi bilan hamkorlikda o‘tkazildi.

Seminarda birja sohasidagi qonunchilikka kiritilgan so‘nggi o‘zgarishlar, ikki tomonlama qarama-qarshi auksion, derivativlar va fyuchers savdolari, birja savdolari, birja komissiyalari, kliring, raqobat va ichki nazorat qoidalari, raqamli iqtisodiyot mavzularida maʼruzalar va taqdimotlar o‘tkazildi.

Taʼkidlanganidek, O‘zbekiston Respublikasi Vazirlar Mahkamasining 2024-yil 12-sentabrdagi 570-son qarori bilan tasdiqlangan “Yo‘l xaritasi”da birjada tovar derivativlarini joriy qilish ishlarini jadallashtirish, birja savdolarida qarama-qarshi auksion savdolarini tashkil etish hamda qishloq xo‘jaligi mahsulotlarini realizatsiya qilish jarayonlariga elektron tijorat faoliyatini izchil tatbiq qilish choralari belgilangan.

Shu munosabat bilan O‘zbekiston respublika tovar-xom ashyo birjasi tovar derivativlari bozorini joriy qilish borasida ilg‘or xorijiy birjalar va birja faoliyatiga aloqador tashkilotlar, shuningdek xalqaro tashkilotlar bilan aloqalarni o‘rnatish, birjalararo hamkorlikni kuchaytirish va birja savdolari sohasida tajriba almashish ishlarini amalga oshirmoqda.

Shuningdek, birja savdolari samaradorligini oshirish va savdo ishtirokchilari uchun qo‘shimcha qulayliklar yaratish maqsadida O‘zbekiston respublika tovar-xom ashyo birjasida ikki tomonlama qarama-qarshi auksion ishga tushirilmoqda.

Mazkur savdo rejimida ikki tomon bir vaqtning o‘zida o‘z narx takliflarini berishlari mumkin. Buning natijasida raqobat nafaqat xaridorlar balki sotuvchilar o‘rtasida ham kuchayib boradi.

Auksion davomida sotuvchilar va xaridorlarning narxlari bir biriga mos kelgunga qadar yaqinlashaveradi. Narxlar mos kelgan taqdirda esa, bitimlar inson aralashuvisiz avtomatik tarzda tuziladi.

Shu bilan birga, aholi tomorqalarida, fermer va dehqon xo‘jaliklarida yetishtirilgan qishloq xo‘jaligi mahsulotlarini sotish tizimini takomillashtirish, zarur bozor sharoitlarini yaratish orqali aholi va dehqonlar daromadini oshirish maqsadida O‘zbekiston Respublikasi Vazirlar Mahkamasining 2024-yil 2-oktabrdagi “Zamonaviy agrokompleks faoliyatini ilg‘or birja mexanizmlari asosida tashkil etishning qo‘shimcha chora-tadbirlari to‘g‘risida”gi 621-son qarori qabul qilindi.

Mazkur qaror bilan “O‘zbekiston respublika tovar-xom ashyo birjasi” AJ huzurida tashkil qilingan “Agro Exchange” MCHJning asosiy vazifalari belgilandi hamda “UZEX Agro” elektron savdo platformasida qishloq xo‘jaligi mahsulotlarini sotish tartibi tasdiqlandi.

Birjaning “UZEX Agro” elektron savdo platformasi aholi tomorqalarida, fermer va dehqon xo‘jaliklari tomonidan yetishtirilgan qishloq xo‘jaligi mahsulotlarini erkin bozor narxida sotishga mo‘ljallangan.

Shu bilan birga, “Tovar bozorlarida bozor tamoyillarini joriy qilish va shaffoflikni taʼminlashda O‘zbekiston respublika tovar-xom ashyo birjasining tutgan o‘rni” mavzusida media-trening o‘tkazildi.

Mazkur tadbirdan ko‘zlangan asosiy maqsad O‘zbekiston respublika tovar-xom ashyo birjasining Farg‘ona filiali faoliyati misolida mamlakatimiz tovar bozorlarida birja mexanizmlarini tutgan o‘rni hamda sohada amalga oshirilayotgan islohotlarning mazmun-mohiyatini tushuntirishdan iborat bo‘ldi.

Media-trening davomida ommaviy axborot vositalari vakillari va tadbirkorlar birja filialining faoliyati bilan yaqindan tanishdilar. Xususan, birja faoliyatiga doir so‘nggi o‘zgarishlar hamda birjada amalga oshiriladigan kundalik ishlar batafsil tushuntirildi.

Taʼkidlanganidek, O‘zbekiston respublika tovar-xom ashyo birjasining Farg‘ona filialida markaziy savdo zalidan tashqari jami 45 ta savdo maydonchalari, 126 ta brokerlik idoralari va qariyb 397 ta treyderlar faoliyat yuritadi.

2024 yil yanvar – sentyabr oylarida filialda o‘tkazilgan elektron savdolar natijasida jami 8,3 trln so‘mlik bitimlar tuzilgan bo‘lib, ularning 89% birja savdolariga, qolgan qismi esa elektron tijorat savdo tizimlariga to‘g‘ri kelgan.

Tadbirlar davomida birja mutaxassislari jurnalistlar, brokerlar va tadbirkorlarning qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi