Joriy yil 18-oktabrda Qashqadaryoda O‘zbekiston respublika tovar-xom ashyo birjasining “Xalqchil IPO” Roadshow taqdimoti va jurnalistlar uchun media-trening o‘tkazildi.

Mazkur tadbirlarda birja aʼzolari, treyderlari, savdo ishtirokchilari va ommaviy axborot vositasi vakillari ishtirok etishdi.

Roadshow davomida “O‘zbekiston respublika tovar-xom ashyo birjasi” AJ rahbariyati tomonidan birjaning so‘nggi yillardagi rivojlanish dinamikasi va o‘rta muddatli istiqboldagi rivojlantirish strategiyasi to‘g‘risida batafsil maʼlumotlar berildi hamda kompaniya aksiyalarini sotib olish bo‘yicha “Xalqchil IPO”da ishtirok etish tartibi tushuntirib berildi.

Taʼkidlanganidek, “Xalqchil IPO”da “O‘zbekiston respublika tovar-xom ashyo birjasi” AJ ustav fondidan 4,44 foiz aksiyalarni sotish ko‘zda tutilgan. Shu bilan birga, joylashtirish bo‘yicha narx oralig‘i har bir aksiya uchun 12 900 so‘mdan 18 000 so‘mgacha bo‘lib, arizalarni qabul qilish 2024-yil 28-oktabrgacha davom etadi.

“O‘zbekiston respublika tovar-xom ashyo birjasi” AJ aksiyalarini sotib olish uchun arizalar “E-AUKSION” elektron savdo maydonchasi yoki “GO INVEST” mobil ilovasi orqali berilishi mumkin.

Shu bilan birga, “Tovar bozorlarida bozor tamoyillarini joriy qilish va shaffoflikni taʼminlashda O‘zbekiston respublika tovar-xom ashyo birjasining tutgan o‘rni” mavzusida media-trening o‘tkazildi.

Mazkur tadbirdan ko‘zlangan asosiy maqsad O‘zbekiston respublika tovar-xom ashyo birjasining Qashqadaryo filiali faoliyati misolida mamlakatimiz tovar bozorlarida birja mexanizmlarini tutgan o‘rni hamda sohada amalga oshirilayotgan islohotlarning mazmun-mohiyatini tushuntirishdan iborat bo‘ldi.

Media-trening davomida ommaviy axborot vositalari vakillari va tadbirkorlar birja filialining faoliyati bilan yaqindan tanishdilar. Xususan, birja faoliyatiga doir so‘nggi o‘zgarishlar hamda birjada amalga oshiriladigan kundalik ishlar batafsil tushuntirildi.

Taʼkidlanganidek, O‘zbekiston respublika tovar-xom ashyo birjasining Qashqadaryo filialida markaziy savdo zalidan tashqari jami 9 ta savdo maydonchalari, 135 ta brokerlik idoralari va qariyb 306 ta treyderlar faoliyat yuritadi.

2024-yil yanvar – sentabr oylarida filialda o‘tkazilgan elektron savdolar natijasida jami 9,0 trln so‘mlik bitimlar tuzilgan bo‘lib, ularning 74% birja savdolariga, qolgan qismi esa elektron tijorat savdo tizimlariga to‘g‘ri kelgan.

Birja savdolarida shaffoflikni yanada oshirish, birja faoliyatini amalga oshirish uchun belgilangan talablarni takomillashtirish hamda tizimda raqamli texnologiyalarni keng tatbiq etish maqsadida Vazirlar Mahkamasining 2024-yil 12-sentabrdagi “Birja savdolariga ilg‘or axborot texnologiyalarini keng joriy etish hamda sohada raqamlashtirish jarayonlarini izchil davom ettirish chora-tadbirlari to‘g‘risida” 570-son qarori qabul qilindi.

Mazkur qaror bilan O‘zbekiston respublika tovar-xom ashyo birjasi faoliyatini rivojlantirishning asosiy ustuvor yo‘nalishlari belgilangan. Xususan, joriy yil 1-noyabrdan birjada ikki-tomonlama qarama-qarshi auksion yangi savdo rejimi joriy qilinadi.

Mazkur savdo rejimida ikki tomon bir vaqtning o‘zida o‘z narx takliflarini berishlari mumkin. Buning natijasida raqobat nafaqat xaridorlar balki sotuvchilar o‘rtasida ham kuchayib boradi.

Auksion davomida sotuvchilar va xaridorlarning narxlari bir biriga mos kelgunga qadar yaqinlashaveradi. Narxlar mos kelgan taqdirda esa, bitimlar inson aralashuvisiz avtomatik tarzda tuziladi.

Shu bilan birga, aholi tomorqalarida, fermer va dehqon xo‘jaliklarida yetishtirilgan qishloq xo‘jaligi mahsulotlarini sotish tizimini takomillashtirish, zarur bozor sharoitlarini yaratish orqali aholi va dehqonlar daromadini oshirish maqsadida O‘zbekiston Respublikasi Vazirlar Mahkamasining 2024-yil 2-oktabrdagi “Zamonaviy agrokompleks faoliyatini ilg‘or birja mexanizmlari asosida tashkil etishning qo‘shimcha chora-tadbirlari to‘g‘risida”gi 621-son qarori qabul qilindi.

Mazkur qaror bilan “O‘zbekiston respublika tovar-xom ashyo birjasi” AJ huzurida tashkil qilingan “Agro Exchange” MChJning asosiy vazifalari belgilandi hamda “UZEX Agro” elektron savdo platformasida qishloq xo‘jaligi mahsulotlarini sotish tartibi tasdiqlandi.

Birjaning “UZEX Agro” elektron savdo platformasi aholi tomorqalarida, fermer va dehqon xo‘jaliklari tomonidan yetishtirilgan qishloq xo‘jaligi mahsulotlarini erkin bozor narxida sotishga mo‘ljallangan.

Tadbirlar davomida birja mutaxassislari jurnalistlar, brokerlar va tadbirkorlarning qiziqtirgan savollariga javob berishdi.

Manba: Ommaviy kommunikatsiyalar va tashqi iqtisodiy faoliyat bo‘limi