Xorazmda tadbirkorlar va matbuot xodimlari ishtirokida davra suhbati o‘tkazildi
2022 yil 21 iyun kuni Xorazm viloyatida ommaviy axborot vositalari vakillari ishtirokida O‘zbekiston respublika tovar-xom ashyo birjasi rahbariyati va mutaxassislarning viloyat tadbirkorlari bilan ochiq muloqot o‘tkazildi.
Tadbirda, shuningdek, “Trastbank” XAB mas’ul xodimlari, birja savdolari ishtirokchilari, brokerlar, treyderlar va matbuot xodimlari ishtirok etdilar.
Uchrashuvda tadbirkorlarga birja savdolari sohalarida so‘nggi yangiliklar hamda sifatli bank xizmatlari orqali birja savdolarida samarali ishtirok etish imkoniyatlari to‘g‘risida batafsil ma’lumotlar taqdim etildi.
Ta’kidlanganidek, o‘tkazilayotgan ochiq va shaffof birja savdolari tadbirkorlarning tovar resurslaridan erkin foydalanish imkoniyatlarining kengayishi va sotuvchi-korxonalarning daromadlarini oshishiga ko‘mak bermoqda hamda tovar bozorlarida sog‘lom raqobatning rivojlanishini ta’minlamoqda.
O‘zbekiston Respublikasi Prezidentining “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi qaroriga muvofiq un mahsulotlari joriy yil 1 iyundan, g‘alla mahsulotlari esa 1 iyuldan boshlab ochiq birja savdolariga qo‘yilishi belgilangan.
Ayni paytdi, g‘alla mahsulotlarini ochiq birja savdolari orqali sotilishi uchun O‘zbekiston respublika tovar-xom ashyo birjasida barcha zarur sharoitlar yaratilgan.
Xususan, fermerlar bug‘doy mahsulotlarini birja orqali sotishda birjaning komission to‘lovlari va garov mablag‘larini kiritishdan ozod etiladi.
Shuningdek, tumanlarda bug‘doyni birja orqali samarali sotilishini yo‘lga qo‘yish maqsadida, 10 mingdan ziyod fermerlar o‘qitildi, hamda birjada ro‘yxatdan o‘tkazilib, brokerlarga biriktirildi.
O‘zbekiston respublika tovar-xom ashyo birjasida faoliyat yuritayotgan brokerlar sonini ko‘paytirish maqsadida birja mutaxassislari tomonidan O‘zbekiston Savdo sanoat palatasining 200 dan ziyod xodimlari o‘qitildi va birjada broker sifatida ro‘yxatdan o‘tkazildi.
Shu bilan birga, O‘zbekiston fermer, dehqon xo‘jaliklari va tomorqa yer egalari kengashining Buxgalterlar markazining 1 500 dan ziyod hodimlari ham birja savdolari yo‘nalishida o‘qitildi.
Tadbir davomida birja savdolarini amalga oshirishda hisob-kitob operatsiyalarni tezkorligi va qulayligini ta’minlash maqsadida yaratilgan yangi servislarning taqdimotlari ham o‘tkazildi.
Uchrashuv yakunida birja va bank rahbarlari va mutaxassislari matbuot xodimlari va tadbirkorlarning qiziqtirgan savollariga javob berishdi.
Manbaa: "O'zRTXB" AJ PR bo'limi