O‘zbekiston Respublikasi Prezidentining 2025-yil 26-iyundagi PQ-207-sonli qaroriga muvofiq oltin izlovchilar hamda affinaj korxonalari tomonidan qimmatbaho metallarni O‘zbekiston respublika tovar-xom ashyo birjasi tomonidan tashkil etiladigan birja savdolari orqali realizatsiya qilish tartibi tasdiqlandi.

Ushbu tartib sohani mahalliy sanoatning asosiy drayverlaridan biriga aylantirish, qimmatbaho metallar va qimmatbaho toshlardan zargarlik buyumlarini ishlab chiqarish faoliyati hamda savdosini qo‘llab-quvvatlash maqsadida tasdiqlangan.

Hujjatga muvofiq qimmatbaho metallarni oltin izlovchilar usulida qazib olishga doir faoliyatni amalga oshiruvchi tadbirkorlik subyektlari hamda affinaj korxonalari qimmatbaho metallarni birja savdolari orqali realizatsiya qilishi mumkin.

Bunda, birja savdolari boshlang‘ich narx o‘sishga qaratilgan auksion shaklida o‘tkaziladi. Sotuvchi va xaridorlar savdolarda qatnashishlari uchun o‘zlarining shaxsiy hisobvaraqlariga 10 foizgacha zakalat mablag‘larini kiritishlari kerak.

Shuningdek, oltin izlovchilar va affinaj korxonalari vakolatli organlar tomonidan beriladigan tegishli litsenziya va maxsus laboratoriya xulosalariga ega bo‘lishlari shart.

Yangi tartib mahalliy zargarlik buyumlarini ishlab chiqarishni rivojlantirish, ularning ichki va tashqi bozorda raqobatbardoshligini ta’minlash, shuningdek, aholining sifatli zargarlik mahsulotlariga bo‘lgan ehtiyojini qondirishga xizmat qiladi.

Mazkur tartibning to‘liq matni bilan "O‘zRTXB" AJ rasmiy vebsaytining hujjatlar bo‘limida tanishib chiqishingiz mumkin.

Manba: Ommaviy kommunikatsiyalar va tashqi iqtisodiy faoliyat bo‘limi