Joriy yilning 5-may kuni “O‘zmetkombinat” AJda davlat xaridlari bo‘yicha elektron savdo tizimi – xarid.uzex.uz ga bag‘ishlangan seminar o‘tkazildi. Tadbir alohida tartibda nazorat qilinadigan davlat buyurtmachilari bilan davlat xaridlarini amalga oshirish jarayonlarini o‘rganish, ya’ni maxsus axborot portalida ishlash uchun ko‘nikma hosil qilish maqsadida tashkil etildi.

O‘zbekiston respublika tovar-xom ashyo birjasining Toshkent filialining Elektron tijoratni rivojlantirish va xaridlarni tashkil etish bo‘limi mutaxassislari tomonidan olib borilgan seminarda “O‘zmetkombinat” AJning davlat xaridlari tizimi bo‘yicha faoliyat olib boruvchi xodimlari ishtirok etdi.

Tadbir O‘zbekiston Respublikasi Prezidentining 2021-yil 17-martdagi “Yuqori likvidli va monopol tovarlarni sotish jarayonlariga bozor mexanizmlarini joriy etishni davom ettirish chora-tadbirlari to‘g‘risida”gi 5031-son qarorining ijrosini ta’minlash doirasida o‘quv-seminar shaklida o‘tkazildi.

Seminarda davlat xaridlari sohasida amalga oshirilgan islohotlarga bag‘ishlangan taqdimot namoyish etildi. Ta’kidlash kerakki, 2021-yil 22-aprelda Yangi tahrirda qabul qilingan “Davlat xaridlari to‘g‘risida”gi Qonuni davlat xaridlari tizimining ochiqligini yanada kengroq ta’minlaydi, sohada zamonaviy axborot texnologiyalari yordamida inson omili aralashuvi yanada qisqartiradi.

2021 yil yakunlariga ko‘ra davlat xaridlari bo‘yicha elektron savdo tizimi xarid.uzex.uz da jami 11,0 trln so‘mlik 1 mlndan ziyod bitimlar tuzilgan bo‘lsa, 2022-yil I chorak yakuniga ko‘ra qariyb 4,2 trln so‘mlik bitimlar tuzilgan bo‘lib, budjet va korporativ buyurtmachilar mablag‘larining tejalishi ham 879,2 mlrd so‘mga teng bo‘ldi.

Uchrashuv davomida yangi tahrirdagi Qonunga muvofiq kiritilgan yangiliklar, qonunchilikda xaridlarni amalga oshirishda belgilangan me’zonlarga alohida to‘xtalib o‘tildi. Davlat xaridlari bilan bog‘liq mavjud muammolar o‘rganilib, shu joyning o‘zida bartaraf etildi.

Tadbir yakunida “O‘zmetkombinat” AJ vakillari o‘zlarini qiziqtirgan savollarga javob olish bilan birga davlat xaridlari tizimiga o‘zgartirish va yangiliklar kiritish bo‘yicha takliflar bildirdilar. Barcha fikr-mulohazalar va takliflar inobatga olinib, bu sohadagi hamkorlikni yanada rivojlantirishga kelishib olindi.

Manba: Ommaviy kommunikatsiyalar va tashqi iqtisodiy faoliyat bo‘limi