Hamkorlik bo‘yicha Yo‘l xaritasini amalga oshirish doirasida O‘zbekiston respublika tovar-xom ashyo birjasi O‘zbekiston Respublikasi Raqobatni rivojlantirish va iste’molchilar huquqlarini himoya qilish qo‘mitasi hamda AQSH Savdo vazirligining Tijorat huquqini rivojlantirish dasturi (CLDP) bilan hamkorlikda tovar derivativlari bozorini rivojlantirish va O‘zbekistonda fyuchers savdosini joriy etishga qaratilgan qator o‘quv seminarlarini o‘tkazishni boshladi.

Tadbir tovar derivativlari bozorini rivojlantirish, tartibga solishning xalqaro standartlarini joriy etish hamda O‘zbekistonda zamonaviy muddatli bozor infratuzilmasini shakllantirish masalalarini muhokama qilish maqsadida davlat organlari va sohaviy tashkilotlar vakillarini birlashtirdi.

Seminarda milliy derivativlar bozorini rivojlantirish va narx xavflarini boshqarish vositalarini joriy etish bo‘yicha loyihalarni amalga oshirib kelayotgan O‘zbekiston respublika tovar-xom ashyo birjasi (O‘zRTXB) vakillari ham faol ishtirok etdilar.

Seminar davomida CLDPning fyuchers bozorlari bo‘yicha xalqaro eksperti Kevin Pikkoli fyuchers bozorlarining faoliyat yuritish tajribasi hamda ular infratuzilmasining asosiy elementlari, jumladan birja, kliring tashkiloti, brokerlar va regulyatorning o‘rni haqida xalqaro tajribani taqdim etdi.

Seminarning birinchi kunida ishtirokchilar fyuchers shartnomalari savdosining asoslari, xedjirlash, kliring va hisob-kitob mexanizmlari, shuningdek AML/CFT va KYC talablari hamda investorlar huquqlarini himoya qilish masalalarini ko‘rib chiqdilar. O‘zRTXB vakillari derivativlar bo‘yicha birja savdosini tashkil etish, kliring tizimini shakllantirish va xavflarni boshqarish masalalari muhokamasida ishtirok etdilar.

Seminarning ikkinchi kuni tovar derivativlari bozorini tartibga solish masalalariga bag‘ishlanadi. Unda komplayens, bozor nazorati, huquqni qo‘llash amaliyoti hamda o‘zini o‘zi tartibga soluvchi tashkilotlar bilan hamkorlik masalalari muhokama qilinadi.

Manba: Ommaviy kommunikatsiyalar va tashqi iqtisodiy faoliyat bo‘limi